राजनीति
महाधिवेशनले पार्टीको आन्तरिक एकतालाई थप सुदृढ बनाएको छ : मन्त्री खाँण
पोखरा। नेपाल तरुण दलका केन्द्रीय निर्देशन समितिका संयोजक बालकृष्ण खाँणले पोखरामा सम्पन्न दलको चौंथो राष्ट्रिय महाधिवेशनले पार्टीको एकतालाई थप सुदृढ बनाएको बताएका छन् ।
महाधिवेशनबाट गरिएको नेतृत्व चयनलगायतका विषयमा जानकारी दिने उद्देश्यका साथ पोखरामा आयोजित पत्रकार भेटघाट कार्यक्रममा उनले मुलुकको वर्तमान राजनीतिक परिस्थितिमा पार्टीको आन्तरिक एकता मजबुत बन्नुपर्ने आवश्यकतालाई दृष्टिगत गरी पार्टी नेतृत्व र प्रतिनिधिको भावनालाई मनन गरी सर्वसम्मत नेतृत्व चयन गरिएको जानकारी दिए।
उनले महाधिवेशनमा अध्यक्षको प्रतिवेदन, आर्थिक प्रतिवेदन पारित भई विधान संशोधनलगायतका प्रस्ताव निर्देशन समितिमा पठाउने निर्णय भएको र महाधिवेशन सफलतापूर्वक सम्पन्न गराएकोमा तरुण दलका केन्द्रीय अध्यक्ष एवम् सदस्य, सहभागी प्रतिनिधि सबैलाई धन्यवाद व्यक्त गरे ।
उनले नेपाल तरुण दलको विधान संशोधित र परिमार्जित बमोजिम दलको केन्द्रीय समितिका बाँकी पदाधिकारी र सदस्यको चयन केन्द्रीय निर्देशन समितिको आगामी बैठकबाट गरिने जानकारी दिए ।
रक्षामन्त्री एवम् तरुण दलका पूर्व अध्यक्षसमेत रहेका नेता खाँणले काठमाडौं फर्केलगत्तै पोखरामा निर्माणाधिन पोखरा अन्तर्राष्ट्रिय विमानस्थलको कार्यलाई तीव्रताका साथ अघि बढाउन पहल गर्ने विश्वास व्यक्त गरे।
निर्देशन समितिले अध्यक्ष, उपाध्यक्ष, महासचिव र कोषाध्यक्षमा क्रमशः जीतजङ्ग बस्नेत ललितपुर, उत्तम चापागार्इँ भोजपुर, भूपेन्द्रजङ्ग शाही कालीकोट र विद्वान गुरुङ पर्वतलाई सर्वसम्मत चयन गरेको छ ।
चौं महाधिवेशनबाट नवगठित नेपाल तरुण दलका केन्द्रीय अध्यक्ष जीतजङ्ग बस्नेतले समाजमा विद्यमान विकृति विसङ्गतिका विरुद्धमा सङ्घर्ष गर्दै आगामी दिनमा नवीनतम सोचका साथ दलको सङ्गठन देश र समाजको हितमा क्रियाशील बन्ने धारणा राखे ।
नेपाल तरुण दलका निवर्तमान अध्यक्ष उदयशम्शेर राणाले पोखरा महाधिवेशनलाई सम्पन्न गराउन महत्वपूर्ण सहयोग गर्ने पार्टी सभापतिसहित दलका नेता, निर्देशन समितिका संयोजक एवम् सदस्य, कार्यसमितिका सदस्य, सञ्चारकर्मी सबैमा आभार व्यक्त गरे । रासस
प्रकाशित मिति: बुधबार, मंसिर १, २०७३ १६:१९
प्रतिक्रिया दिनुहोस्
सम्बन्धित समाचार
सिफारिस
प्रवास
कार्टुन
भिडियो
विचार
अन्तर्वार्ता
-1749010126.jpg)
ब्लग
लोकप्रिय
