काठमाडौं । कोरोना भाइरसका कारण विगत एक महिनादेखि नेपालको चीनसँगको नाका बन्द रहँदै आएको छ । जसका कारण अर्बौं मूल्य बराबरका सामान चिनियाँ नाकामा रोकिएको व्यवसायी बताउँछन् ।

व्यवसायीहरूले चीनतर्फको नाकाबाट सामान ल्याउन दिने व्यवस्था मिलाइदिन सरकारसँग आग्रह गर्दै आएका छन् । यस विषयमा के गर्ने भन्ने विषयमा औपचारिक निर्णय भइसकेको पनि छैन । 

व्यवसायीहरूले ५० अर्ब बराबरको सामान चिनियाँ नाकामा रोकिएको बताउँदै आएका छन् । फलफूल र लसुनको मात्रै करिब ७० करोड रुपैयाँ बराबरको सामान एक महिनादेखि रोकिएको व्यवसायी कुमार पाण्डेले बताए । ती सामान आयात गर्न दिन व्यवस्था मिलाइन सरकारलाई आग्रह गरिरहेको उनले बताए । सरकारले पनि के गर्ने भन्ने विषयमा चिनियाँ पक्षसँग छलफल गरिरहेको जनाएको छ । 

सामान लिन जाने ड्राइभरलाई १४ दिन क्वारेन्टाइनमा राखिने

चीनका अधिकारीहरूले चिनियाँ नाकामा रोकिएका सामान लिन जान सक्ने तर चीनको भूभागमा गएपछि १४ दिन क्वारेन्टाइनमा बस्नुपर्ने भनेका छन् । रसुवा भन्सार कार्यालयका प्रमुख पुण्यविक्रम खड्काले हिजो चिनियाँ अधिकारीसँग भएको छलफलमा उनीहरूले सामान लिन आउने ड्राइभरलाई आफूहरूको जिम्मामा १४ दिन क्वारेन्टाइनमा राखेपछि मात्रै नेपाल आउन दिने बताएको जानकारी दिए । 

उनले भने, “हामीले हिजो मात्रै चिनियाँ अधिकारीसँग रोकिएका सामान ल्याउन के गर्ने भन्ने विषयमा छलफल गरेका थियौं । उनीहरूले सामान लिन आउने ड्राइभरलाई १४ दिन र गाडीलाई पनि न्यूनतम ४८ घण्टा क्वारेन्टाइनमा राख्नुपर्ने बताएका छन् ।” उनले चिनियाँ अधिकारीसँग भएको छलफलबारे माथिल्लो निकाय र व्यवसायीलाई समेत जानकारी गराइसकेको बताए । 

“चिनियाँ अधिकारीले उनीहरूकै खर्चमा नेपालबाट सामान लिन जानेलाई १४ दिन क्वारेन्टाइनमा राखेपछि मात्रै फर्कन दिने बताएका छन् । यो विषयमा व्यवसायीलाई पनि अवगत गराएका छौं,” उनले भने ।

यता, व्यवसायी भने चिनियाँ पक्षले १४ दिने क्वारेन्टाइनमा राख्ने नभनेको बताउँछन् । व्यवसायी पाण्डेले सामान लिन जाने ड्राइभरलाई चिनियाँ पक्षले सिधै अस्पताल लैजाने र सामान लोड भएपछि तत्कालै नेपाल फिर्ता पठाउने भनेको बताए ।

यस्तै कृषि मन्त्रालयले पनि कृषिजन्य सामग्री आयात गर्दा क्वारेन्टाइन जाँचपास तत्काल नगर्न भनेकाले फलफूल, तरकारीमा चीन, इरान, कोरिया, इटाली र जापानबाट पशु तथा पशुजन्य विरुवा, विरुवाजन्य तथा खाद्य वस्तु आयातको सिफारिस नै रोक्का गरेको छ ।

मन्त्रालयका सहसचिव एवं प्रवक्ता डा. हरिबहादुर केसीले यी पाँच मुलुकबाट कुनै पनि सामान आयात गर्न प्रतिबद्ध लगाइएको र तत्काल हट्ने सम्भावना नभएको बताए ।