काठमाडौं । सरकारले विदेशबाट आउने यात्रुका लागि थप ७० वटा होटेललाई क्वारेन्टिनका लागि सूचीकृत गरेको छ । होटेलहरूकै सिफारिसमा पर्यटन विभागले पाँचवटा पाँचतारेसहित थप ७० वटा होटललाई क्वारेन्टिन होटलका रूपमा सूचीकृत हो । भारतबाट आउनेहरूका लागि यसअघि नै ८ वटा होटेल क्वारेन्टिज होटेलको रूपमा सूचीकृत छन् ।
विभागका महानिर्देशक रुद्रसिंह तामाङले सरकारले थप तीनवटा मुलुकबाट यात्रु आउन दिने निर्णयपछि क्वारेन्टिन होटेलको संख्या थप गरेको बताए । होटेल संघ नेपाललगायत होटेल व्यवसायीहरूको सिफारिसअनुसार नै यी होटेललाई क्वारेन्टिन होटेल तोकिएको उनले बताए ।
सरकारले पछिल्लोपटक चीन, कतार र टर्कीका लागि उडान खुला गर्ने निर्णय गरेको थियो । यी तीन मुलुकमा सातामा एक दिन नियमति उडान गर्न दिने निर्णय सरकारले गरेको हो । यी मुलुकबाट ७२ घन्टाभित्रको पीसीआर रिपोर्ट लिएर आउने यात्रु अनिवार्य १० दिन होटेल क्वारेन्टिनमा बस्नुपर्छ । कोरोनाविरुद्धको एक मात्रा खोप लगाएको भए ३ दिन होटेल क्वारेन्टिनमा बस्नुपर्ने छ । यी मुलुकबाट नेपाल आउने यात्रुले कोभिड विरुद्धको दुवै मात्रा खोप लगाएको भए होम क्वारेन्टिनमा बस्नुपर्छ ।
यी तीन मुलुकबाट आउने यात्रुलाई लक्षित गरी सरकारले थप ७० वटा होटेललाई क्वारेन्टिनका लागि सूचीकृत गरेको होटेल संघ नेपालका वरिष्ठ उपाध्यक्ष विनायक शाहले बताए । तारे होटेलबाहेक अन्य होटेलका लागि क्वारेन्टिन शूल्क ३ हजार रुपैयाँ तोकिएको छ भने तारे होटेलको हकमा आपसी सहमतीमा भनिएको छ । भारतबाट आउने यात्रुले ३ हजार शूल्क तिरिरहेका छन् ।
विभागले होेटेलसँगै मापदण्ड पनि तोकेको छ । कम्तीमा २० वटा कोठा भएका होटललाई क्वारेन्टिन तोकिएको छ । होटेल क्वारेन्टिनका लागि पाँच तारे होटेलमा सांग्रिला, होटेल र्याडिसन, होटेल याक एण्ड यती, हायात रिजेन्सी, सोल्टी, अलफ्ट होटेल र एभरेस्ट होटेल रहेका छन् । होटेल क्वारेन्टिनका लागि यी होेटेलहरूले ५० भन्दा बढी कोठा छुट्याएका छन् ।
यस्तै चारतारे होटेलहरू शंकर र होटेल हिमालय र ग्राण्ड होेटेल पनि क्वारेन्टिन होटलमा सूचीकृत भएका छन् । तीनतारे स्तरका समिट, अमादब्लम, साम्बाला, हिमालय, होटेल प्लाटिनम, होटेल ट्रेडिसनल कम्फर्ट र होटल ल्यान्डमार्क रहेका छन् । यी होटेलहरूले २० भन्दा बढी कोठा छुट्याएका छन् ।
दुईवटा रिसोर्ट पार्क भिलेज र गोकर्ण फरेस्ट रिसोर्टसहित पर्यटनस्तरका ५१ होटेल पनि क्वारेन्टिन होेटेलमा सूचीकृत भएका छन् ।
यस्ता हुनुपर्छ सुविधा:
१. कम्तीमा २० कोठा भएको ।
२. स्वास्थ्यसम्बन्धी तोकिएको मापदण्ड पालना गर्ने गरी होटल परिसरको छुट्टै गेट वा कम्पाउण्ड भएको र सकेसम्म घुमफिर गर्न सक्ने खुला ठाउँ र बगँैचा भएको ।
३. होटल क्वारेन्टिनमा रहेका हवाई यात्रुहरूलाई सेवा प्रदान गर्न (खाना, पानी, अन्य लजिष्टिक सपोर्ट) र स्वाव परीक्षणको नमूना संकलनको लागि पर्याप्त खुला ठाउँ भएको ।
४. होटलको कोठामा टीभी, वाईफाई अनिवार्य भएको ।
५. होटलको कोठामा अट्याच ट्वाइलेट र नुहाउन तथा पिउन तातो पानीको व्यवस्था भएको ।
६. होटलमा खाना र अन्य सेवाहरू कोठामा वा प्यासेजमा मात्र प्रदान गर्ने व्यवस्था भएको ।
७. होटलको प्रत्येक प्रस्थान कक्षमा साबुनपानीले हात धुने व्यवस्थाका साथै सेनिटाइजरको व्यवस्था भएको ।
८. होटलले प्रदान गर्ने सेवाहरू सामूहिक रूपमा खाना खाने स्थल, बुफे, जिम, साउना, इन्डोर तथा आउटटडोर गेम पूर्ण रूपमा बन्द गरेको ।
९. प्रत्येक कोठामा एक हप्ता पुग्नेगरी साबुन, टुथपेष्ट, ब्रस, हेन्डवास र टावेल राखिएको ।
१०. नेपाली तथा विदेशी नागरिकहरू विदेशबाट नेपाल आउँदा पालन गर्नुपर्ने मापदण्ड, २०७८ मा तोकिएको क्षेत्रमा रहेको होटल हुनुपर्ने ।
-1749010126.jpg)
