काठमाडौं । थुनामा रहेको व्यक्तिलाई छुटाइदिने आश्वासन दिएर ४५ लाख रुपैयाँ ठगी गरेको आरोपमा पक्राउ एकजना पक्राउ गरेका छन् । 

पक्राउ पर्नेमा सर्लाहीको मलंगवा नगरपालिका–४ का ४५ वर्षीय सुजितकुमार सिंह रहेका छन् । पछिल्लो समय उनी ललितपुरस्ति धापाखेलमा बस्दै आएका थिए ।

काठमाडौं उपत्यका अपराध अनुसन्धान कार्यालयका अनुसार उनले ०८० चैत २९ गते जुवा तथा सट्टेबाजीसम्बन्धी कसुर मुद्दामा पक्राउ परेका सञ्जयकुमार साहलाई छुटादिने आश्वासन दिएर उनका आफन्तहरूसँग सम्पर्क गरेका थिए । उनले आफ्नो उच्च पदस्थका व्यक्तिहरूसँग नजिकको चिनजान रहेको बताएका थिए । उनले आफूले सरकारी वकिल, न्यायाधीश र प्रहरीलाई तलदेखि माथिसम्म पैसाले सेटिङ मिलाउन सक्ने बताएका थिए ।

उनले साहका आफन्तलाई काठमाडौंका विभिन्न स्थानमा बोलाएर नगद २० लाख र चेकमार्फत २५ लाख रुपैयाँ गरी ४५ लाख रुपैयाँ ठगी गरेको प्रहरीले जनाएको छ ।

थप अनुसन्धान र कारबाहीका लागि उनलाई जिल्ला प्रहरी परिसर टेकु पठाइएको काठमाडौं उपत्यका अपराध अनुसन्धान कार्यालयका प्रवक्ता रविन्द्र रेग्मीले जानकारी दिए ।