काठमाडौं । नेपाली कांग्रेसका नेता कृष्णप्रसाद सिटौलाले आउँदो निर्वाचनमा आफ्नो पार्टीले एक्लै प्रतिस्पर्धा गर्ने बताएका छन् । सोमबार काठमाडौंमा पार्टीको महानगरस्तरीय भेलामा उनले यस्तो बताएका हुन् ।

उनले आउँदो निर्वाचनमा गठबन्धन नगरी कांग्रेस एक्लै लड्ने र बहुमत ल्याउने जिकिर गरे । “हामी आगामी चुनाव एक्लै फेस गर्द छौँ । एक्लै जान्छौँ चुनावमा,” उनले भने, “एक्लै फेस गरेर जाँदा पनि हार्ने गरी होइन, बहुमत ल्याउने गरी जाने हो ।”

आफूले गरेका राम्रा कामको प्रचारप्रसार गर्न पार्टी अघि सर्नुपर्ने र कमी–कमजोरीको पनि जस/अपजस लिनुपर्नेमा उनले जोड दिए ।

“...देशको विकासमा हामीले जे जति काम गरेका छौँ, गरेका राम्रा कुराहरू भन्दै जानुपर्छ, भन्न छोड्नु हुन्न,” उनले भने, “तर, यो पनि होइन कि पर्याप्त गरिसक्यौँ भन्ने होइन । जनताका अधिकार पूरा कार्यान्वयन गर्न धेरै काम बाँकी छ ।”

उनले अगाडि भने, “कानुन बनाउन, योजना निर्माण गर्न धेरै काम बाँकी छ । शिक्षा, स्वास्थ्यको क्षेत्रमा धेरै काम बाँकी छ । तर, जे जति गरेका छौँ, हामीले नै गरेका छौँ । नेपाली कांग्रेस पार्टीले गर्न सकेन भने कुनै पार्टीले गर्ने लक्षण देखाएको छैन ।” न्युज एजेन्सी नेपाल