काठमाडौं । गएको सोमबार राम कार्की मोटरसाइकलमा सुन्धाराबाट रत्नपार्क जाँदै थिए । न्युरोड गेटको घुम्तीमा पुगेपछि गलत दिशाबाट अर्को मोटरसाइकल हुइँकिदै आयो । उनलाई सचेत गराउन कार्कीले हर्न बजाए ।
तर, नजिकैका ट्राफिक एक ट्राफिक प्रहरी जवानले कार्कीलाई रोके । उनको साथमा भएको कागजात जाँच गरे ।

ट्राफिक प्रहरीले मागेको सबै कागजात दिए । यति हुँदा हुँदै ट्राफिक भने, ‘तपाईंलाई जरिवाना हुन्छ ?’ कार्की अचम्ममा परे । प्रश्न गरे, ‘‘के–को जरिवाना ?’’ ट्राफिक प्रहरीले उत्तर दिए, ‘‘तपाईंले हर्न बजाउँदै आउनुभयो ।’’
कार्कीले हर्न बजाउनुको कारणबारे ती ट्राफिक प्रहरीलाई सक्ने जति ‘कन्भिन्स’ गर्ने प्रयास गरे । 

तर, ट्राफिक प्रहरीले पछिल्लो समय उपत्यकामा ‘नो हर्न’ अभियान चलाएको हुँदा कुनै पनि हालतमा जरिवाना हुने जवाफ मात्र दिएनन् कि उनलाई कारबाही नै गरी छाडे ।

‘नो हर्न’ उल्लंघनमा कार्कीलाई ५०० सय रुपैयाँ ट्राफिक प्रहरीले ई–सेवामार्फत जरिवाना गराउँदै छाडे ।

पछिल्लो सयम कार्कीजस्तै उपत्यकाका तीन जिल्ला काठमाडौं, ललितपुर र भक्तपुरबाट मात्रै ट्राफिक प्रहरीले ‘नो हर्न’ प्रत्येक दिन ५० हजार रुपैयाँभन्दा बढी राजस्व संकलन गर्दै आएको छ ।

ट्राफिक प्रहरी प्रवक्ता एसपी सञ्जयबहादुर राउतका अनुसार, सवारी चालकले जथाभावी र लापरवाही तरिकाले हर्न बजाएको गुनासोका आधारमा ‘नो हर्न’ अभियान थालिएको हो ।

उनी भन्छन्, ‘‘हामीले एक महिनादेखि ‘नो हर्न’ अभियान कडाइका साथ सुरु गरेका छौं । यो अभियान अझै जारी राखिने छ । जथाभावी हर्न बजाउँदा वृद्धादेखि बालबालिकालाई नराम्रो असर परेको गुनासो आएका कारण यो अभियान सुरु गरेका हौँ ।’’

आवश्यकता पर्दा बजाएको ‘हर्न’मा भने ट्राफिक प्रहरीले कुनै कारबाही नगर्ने एसपी राउतको दाबी छ । उनले भने, ‘‘हर्न कहीँ पनि बजाउनु हुँदैन भन्ने होइन । अलिकति जाम हुँदा पनि हर्न बजाउने प्रवृत्ति चालकहरूमा छ । त्यसबाहेक बालबालिका र वृद्धालाई असर हुने र ओभरटेक गर्नसमेत अनावश्यक हर्न बजाउने परिपाटी रोक्न ‘नो हर्न’ अभियान थालिएको हो ।’’

चालकको सचेतनाका लागि माइकिङ तथा प्लेकार्ड प्रदर्शनमा राखिएको एसपी राउतको भनाई छ । उपत्यका ट्राफिक प्रहरी कार्यालयको चालु आर्थिक वर्ष २०८१/०८२ को ६ महिना माघ १३ गतेसम्म १० हजार ८४५ जना सवारी चालक कारवाहीमा परेका छन् ।

त्यसमध्ये पनि सबैभन्दा बढी पुस महिनामा परेका छन् । पुस महिनामा मात्रै ३ हजार १९६ जना सवारी चालक कारबाहीमा परेका छन् ।

मंसिरमा २ हजार ८९० जना तथा कार्तिकमा २ हजार ५५२ जना सवारी चालक कारबाही परेका छन् । चालु आर्थिक वर्षको तीन महिना साउन, भदौ र असोजमा भने २ हजार २०७ जनामात्रै कारबाही परेका थिए ।

चालु आर्थिक वर्षको तुलनामा गएको आर्थिक वर्ष २०८०/०८१ मा हर्न बजाएर ट्राफिक नियम उल्लंघन गर्ने १० हजार १२३ जना सवारी चालक कारबाहीमा परेका थिए । तर, चालु आर्थिक वर्षको ६ महिनामै गत आर्थिक वर्षको भन्दा बढी सवारी चालक कारबाहीमा परेका छन् ।