काठमाडौं । नेकपा (एमाले)का सांसद योगेशकुमार भट्टराईले पूर्वराजा ज्ञानेन्द्र शाहले निर्मलनिवासबाट केही व्यक्तिलाई माला लगाएर जनताको घर जलाउन पठाएको आरोप लगाएका छन् । सोमबार (चैत १८) प्रतिनिधिसभा बैठकमा उनले शाहले राज्यसँगको सम्झौता भंग गरेको भन्दै उनलाई दिइएको सेवा सुविधा कटौती गर्नेबारे सोच्नुपर्नेमा जोड दिए ।

“पूर्वराजा शाहलाई सरकारले पूर्वराष्ट्राध्यक्षको हिसाबले यो राज्यले सेवा सम्मान दिन्छ भनेर दिएको हो । आज त्यो सम्झौता पनि ज्ञानेन्द्र शाहले भंग गर्नुभयो,” उनले भने, “त्यसैले आज म यो संसद्‌मार्फत प्रश्न गर्न चाहन्छु– सम्झौता भंग भएपछि उहाँलाई दिएको सेवा सुविधा कायम हुन्छ कि हुँदैन ?”

उनले अगाडि भने, “म सरकारलाई सोध्न चाहन्छु– उहाँले सम्झौता भंग गर्नुभयो । उहाँले लफंगाहरूलाई जनकमान्डर बनाउनुभयो । तीनकुनेमा ताण्डव नृत्य नचाउन पठाउनुभयो । म फेरि भन्छु– निर्मलनिवासबाट लफंगाहरूलाई माला लगाएर जनताको घर जलाउन पठाउनुभयो । तपाईंको सम्झौता भंग भयो । त्यसैले तपाईंलाई दिइएको सेवा सुविधा के हुन्छ – सरकारले जवाफ दिनुपर्‍यो ।”

उनले पृथ्वीनारायण शाह र बहादुर शाहबाहेकका राजाले राष्ट्र जोगाउने काम गर्न नसकेको टिप्पणी गरे । न्युज एजेन्सी नेपाल