काठमाडौं । म्यानमारमा गएको विनाशकारी भूकम्पपछि खोज तथा उद्धार र पुनर्लाभमा सहयोग गर्दै आएका अमेरिकाका तीन सहायताकर्मीलाई डोनाल्ड ट्रम्प प्रशासनले कामबाट हटाएका छन् । ट्रम्प प्रशासनको यो निर्णयका कारण आपतकालीन प्रतिक्रियामा असर पारेको एक पूर्ववरिष्ठ कर्मचारीले बताएको समाचार संस्था रोयटर्सले जनाएको छ ।

विनाशकारी भूकम्पपछि अवस्थाको मूल्यांकनका लागि दक्षिण–पूर्वी एसियाली राष्ट्र (म्यानमार) पुगेका तीन अधिकारीलाई यसै हप्ताको अन्त्यतिर कामबाट हटाइएको सूचना दिइएको अमेरिकी अन्तर्राष्ट्रिय विकास एजेन्सी (यूएसएआईडी)की पूर्वअधिकारी मार्सिया वोंगले बताइन् ।

अत्यन्तै मेहनत गरेर यो टोलीले म्यानमारमा मानवीय सहायता आवश्यकता भएकाहरूको पहिचान गर्न लागिपरेको बेला जागिरबाट हटाइएको खबर आएको यूएसएआईडीको मानवीय सहयोग ब्युरोकी पूर्वउपप्रशासक वोंगले बताइन् ।

ट्रम्पको सरकारले ७.७ म्याग्निच्युडको भूकम्पपछि म्यानमारलाई ९० लाख डलर सहयोग दिने प्रतिबद्धता जनाएको थियो । भूकम्पमा परी तीन हजार तीनसयभन्दा बढीको ज्यान गएको छ । तर ट्रम्प प्रशासनले यूएसएआईडीमा गरेको ठूलो कटौतीले प्रतिकार्य क्षमतालाई बाधा पुर्‍याएको छ । यसबीच चीन, रूस, भारत र अन्य देशहरूले म्यानमारको भूकम्पपछिको प्रतिकार्यमा सहयोग गरिरहेका छन् ।