काठमाडौं । सरकारको सेयर तथा ऋण लगानीमा सञ्चालित विभिन्न आयोजनामा विनियोजित रकम निरन्तर घट्दो क्रममा रहेको देखिएको छ ।

चालु आर्थिक वर्षमा सरकारको आन्तरिक स्रोततर्फ विनियोजित रकम ४ अर्ब २६ करोड रुपैयाँ विगत वर्षहरूको तुलनामा अत्यन्त न्यून रहेको नेपाल विद्युत प्राधिकरणका कार्यकारी निर्देशक हितेन्द्रदेव शाक्यले बताए ।

विद्युत प्राधिकरणको श्वेतपत्र सार्वजनिक गर्दै उनले वैदेशिक सहायतामा सञ्चालित आयोजनाको स्वदेशी तथा काउन्टरपार्ट फाइनान्सका लागि समेत चालु आर्थिक वर्षमा सरकारको विनियोजित रकम अपर्याप्त रहेको उनको दाबी छ । 

चालू आर्थिक वर्षको फागुनसम्ममा नेपाल सरकारबाट एक अर्ब ४६ करोड रुपैयाँ मात्र प्राप्त भएको छ । प्राधिकरणबाट १४ अर्ब ५३ करोड रुपैयाँ विभिन्न आयोजनामा खर्च भएको छ । प्राधिकरणले आर्थिक वर्षमा २०७३/७४ देखि हालसम्म आफ्नो स्रोतबाट मात्र करिब ५९ अर्ब रुपैयाँ सहायक तथा सम्बद्ध कम्पनीमा लगानी गरेको छ ।

वार्षिक नाफाको तुलनामा आयोजनाहरूमा आवश्यक लगानी रकम अत्यधिक रहेको र सरकारबाट वार्षिक विनियोजन पनि कम हुँदै गएकाले आगामी दिनमा प्राधिकरणको नगद प्रवाह व्यवस्थापन कठिन हुने देखिने उनको भनाइ छ ।

प्राधिकरणको विगत चार वर्षको परिस्थितिको विश्लेषण गर्दा औसतमा विद्युत विक्रीबाट हुने आम्दानीको करिब ५९ प्रतिशत विद्युत खरिदमा मात्र खर्च हुने गरेको छ ।