काठमाडौं । रुसी राष्ट्रपति भ्लादिमिर पुटिनले युक्रेनसँग प्रत्यक्ष वार्ताको आह्वान गरेका छन् । उनले कुनै ढिलाइ नगरी मे १५देखि नै वार्ता सुरु गर्नुपर्ने बताएको बीबीसीले जनाएको छ ।

रुसी राष्ट्रपति कार्यालय क्रेमलिनबाट शनिबार राति ढिलो गरी प्रसारित टेलिभिजन सम्बोधनमा उनले भने, “हामी गम्भीर वार्ता चाहन्छौँ । द्वन्द्वको मूल कारणहरू हटाएर स्थायी र मजबुत शान्तितर्फ बढ्ने प्रयास गर्नुपर्छ ।”

रुसको यो घोषणा युरोपेली नेताहरूले युक्रेन भ्रमण गरी रुसलाई विनासर्त ३० दिने युद्धविराम सम्झौतामा सहमत हुन आग्रह गरेको केही घण्टापछि आएको हो । युरोपेली नेताहरूमा बेलायती प्रधानमन्त्री सर किएर स्टार्मर र फ्रान्सेली राष्ट्रपति इम्यानुएल म्याक्रोन पनि थिए ।

यसको प्रतिक्रियामा राष्ट्रपति कार्यालय क्रेमलिनका प्रवक्ता दिमित्री पेस्कोभले भनेका छन्, “हामीले यसबारे गम्भीरतापूर्वक विचार गर्नुपर्नेछ ।” 

तर उनले चेतावनी दिँदै भने, “हामीलाई दबाब दिन खोज्नु व्यर्थ हो ।’