काठमाडौं । तराईमा गर्मी बढ्दा पहाडी भूभागमा भने वर्षाको सम्भावना रहेको छ । कोसी प्रदेशको तराई क्षेत्रबाहेक मध्ये र पश्चिम तराईमा भने गर्मी बढ्ने मौमसविद्को भनाइ छ । 

“कोसी प्रदेशको तराई भूभागमा बाहेक अन्य प्रदेशका तराई क्षेत्रमा अबका केही दिन गर्मी हुने देखिन्छ,” मौसमविद् रोजन लामिछाने बाह्रखरीसँग भन्छन् । 

काठमाठौंमा भने आज पनि तापक्रममा धेरै फेरबदल नहुने उनले बताए । काठमाडौंमा आंशिक बदली भए पनि वर्षाको सम्भावना छैन । 

“काठमाडौंमा बुधबार अधिकतम तापक्रम ३१ देखि ३३ डिग्री सेल्सियससम्म पुग्नेछ,” उनले भने, “हिजो काठमाडौंको अधिकतम तापक्रम ३१.५ डिग्री सेल्सियस मापन गरिएको थियो ।” सोमबार ३१ डिग्री सेल्सियस रहेको थियो । 

कोसी, वाग्मती र गण्डकी प्रदेशका केही स्थानमा हल्कादेखि मध्यम वर्षाको सम्भावना छ । 

जल तथा मौसम विज्ञान विभागका अनुसार दिउँसो कोसी प्रदेशलगायत देशको पहाडी भूभागमा आंशिकदेखि साधारणतया बदली रहनेछ । बाँकी भूभागमा मुख्यतया मौसम सफादेखि आंशिक बदली रहनेछ ।

कोसी, वाग्मती र गण्डकी प्रदेशका पहाडी भूभागका थोरै स्थानमा र बाँकी पहाडी क्षेत्रका एकदुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ । 

उच्च–पहाडी तथा हिमाली भूभागका केही स्थानमा हल्का वर्षा र हिमपातको सम्भावना रहेको छ । 

लुम्बिनी र सुदूरपश्चिम प्रदेशको थोरै स्थानमा हावाहुरीको समेत सम्भावना छ । 

विभागले राति कोसी, वाग्मती र गण्डकी प्रदेशको पहाडी भूभागमा आंशिकदेखि साधारणतया बदली रहनेछ । बाँकी क्षेत्रको मौसम मुख्यतया सफादेखि आंशिक बदली रहनेछ ।

कोसी, वाग्मती र गण्डकी प्रदेशको पहाडी भूभागका एकदुई स्थानमा मेघगर्जन र चट्याङसहित हल्का वर्षाको सम्भावना छ । 

कोसी, वाग्मती र गण्डकी प्रदेशको उच्चपहाडी तथा हिमाली भूभागका केही  स्थानमा हल्का वर्षा र हिमपातको सम्भावना छ ।

हाल देशमा पश्चिमी र स्थानीय वायुको प्रभाव रहेको छ । बंगालको खाडीबाट आएको जलवाष्पयुक्त हावाको समेत आंशिक प्रभाव रहेको छ ।