काठमाडौं । रूसले ड्रोन र मिसाइलद्वारा युक्रेनको राजधानी कीवमा भीषण आक्रमण गरेको छ । रुसले युक्रेनमाथि शुक्रबार बिहानै आक्रमण गरेको बीबीसीले जनाएको छ ।

युक्रेनको राजधानी कीवका सैनिक प्रशासनका प्रमुख तिमुर त्काचेन्कोले टेलिग्राममा पोस्ट गर्दै आक्रमणबाट ध्वस्त भएका संरचनाको भग्नावशेष थुप्रिएको बताएका छन् ।

कीवका सरकारी अधिकारीहरूका अनुसार, आक्रमणमा चारजना घाइते भएका छन् । जसमध्ये दुई जनालाई अस्पताल लगिएको बीबीसीले जनाएको छ ।

कीवका अधिकारीहरूले हवाई हमला अहिलेका लागि स्थगित भएको बताएका छन् । तर खार्किभ, सुमी र लुहान्स्कलगायत अन्य क्षेत्रहरूमा अझै पनि सतर्कता जारी छ ।

अमेरिकी राष्ट्रपति डोनाल्ड ट्रम्पले भ्लादिमिर पुटिनसँग युक्रेनले रूसी हवाई अड्डामा गरेको ‘स्पाइडर वेब’ ड्रोन आक्रमणबारे कुरा गरेको एक दिनपछि यो आक्रमण भएको हो ।

स्थानीय समयअनुसार बिहान साढे ५ बजेसम्म युक्रेनको धेरै भागमा  सतर्कता अपनाइएको थियो । युक्रेनको रियल–टाइम हवाई हमला सतर्कता नक्साअनुसार उत्तरपश्चिमी भोलिन र रिभ्ने क्षेत्र, पूर्वी सुमी, पोल्टाभा, खार्किभ, लुहान्स्क र डोनेट्स्क क्षेत्र तथा दक्षिणी क्राइमिया  क्षेत्रहरूमा सतर्कता जारी गरिएको थियो ।

आपतकालीन खोजी र उद्धार सेवाहरू तैनाथ गरिएका समाचारमा बताइएको छ । अधिकारीहरूले नागरिकहरूलाई हवाई हमला साइरनको लागि सतर्क रहन र सुझावअनुसार शरणस्थलमा जान आग्रह गरेका छन् ।

सोलोमियान्स्की जिल्लाको १६ तले आवासीय भवनको ११ औँ तलामा र एउटा धातु ह्यांगरमा आगलागी भएको छ । बीबीसी