काठमाडौं । २० महिनाभन्दा बढी समयदेखि चलिरहेको रूस र युक्रेनबीचको युद्ध अझै अन्त्य हुने संकेत देखिएको छैन । सोही क्रममा रूसले युक्रेनको राजधानी किभमा गएराति मिसाइल र ड्रोनबाट शक्तिशाली आक्रमण गरेको छ । 

यो आक्रमणमा कम्तीमा आठजनाको मृत्यु भएको छ, जसमा ६ वर्षीय बालक र उनका आमा पनि समावेश छन् । यसबाहेक १३० जनाभन्दा बढी घाइते भएका छन् ।

किभका मेयर भिटाली क्लिट्स्कोले १२ बालबालिका घाइते भएको बताएका छन्, जुन पूर्ण–स्तरीय युद्ध सुरू भएयता किभमा एकै रातमा घाइते हुने बालबालिकाको सबैभन्दा ठूलो संख्या हो ।

अधिकारीहरूका अनुसार, घाइतेको संख्या अझै बढ्न सक्छ । यस सम्बन्धमा किभ सहरको सैन्य प्रशासन प्रमुख तैमूर त्काचेंकोले बताएअनुसार, ९ तले एक आवासीय भवनको ठूलो हिस्सा मिसाइल लागेर भत्किएको छ । 

धेरै मानिसहरू भग्नावशेषमा पुरिएका र राहत तथा उद्धार टोलीले घटनास्थलमा काम गरिरहेको बताइएको छ । रूसको यो आक्रमणको सम्बन्धमा युक्रेनका राष्ट्रपति भोलोदिमीर जेलेन्स्कीले आफ्नो आधिकारिक टेलिग्राम च्यानलमा सन्देश लेख्दै दुःख व्यक्त गरेका छन् । 

उनले भने, “रूसले मिसाइल र ड्रोनबाट आक्रमण गरेको छ । यो आक्रमण सिधै एक आवासीय भवनमा भएको छ । मानिसहरू मलबेमा पुरिएका छन् । सबै उद्धार टोलीहरू घटनास्थलमा छन् ।” 

युक्रेनको वायु सेनाका अनुसार, रूसले रातको समयमा ३०९ ड्रोन र आठ क्रूज मिसाइल प्रहार गरेको थियो । अधिकारीहरूले बताएअनुसार हवाई प्रतिरक्षा प्रणालीले धेरै ड्रोन र मिसाइल नष्ट गर्न सफल भए पनि क्रूज मिसाइलसहित धेरै ठाउँमा आक्रमण भएको छ ।

सैन्य अधिकारी त्काचेंकोले किभका २७ क्षेत्रहरूलाई निसाना बनाइएको र सबैभन्दा बढी क्षति सोलोमिन्सकी तथा स्वियातोशिन्सकी जिल्लाहरूमा भएको बताए । 

यसैबीच, अमेरिकी राष्ट्रपति डोनाल्ड ट्रम्पले रूसका राष्ट्रपति भ्लादिमिर पुटिनलाई चेतावनी दिएका छन् । उनले अगस्ट ८ सम्ममा शान्तिको दिशामा कुनै प्रगति नभएमा अमेरिकाले रूसमाथि कडा प्रतिबन्ध र भन्सार शुल्क लगाउने बताएका छन् ।

साथै, पश्चिमी देशहरूले पुटिनमाथि शान्ति वार्तालाई जानाजान ढिलो गराएर युक्रेनका थप क्षेत्रहरू कब्जा गर्ने प्रयास गरेको आरोप लगाएका छन् ।