काठमाडौं । तीन दिनदेखि पेट्रोल र डिजेल खरिद गर्न पम्पमा लाम लाग्दै आएका उपभोक्तालाई भोलि शनिबारबाट सहज हुने भएको छ । शनिबारबाट तेल आपूर्ति सहज हुने नेपाल आयल निगमले जनाएको छ । शुक्रबार अपराह्न यातायात मजदुर र सरकारबीच भएको सहमतिसँगै पेट्रोलियम पदार्थ ढुवानी सहज हुने भएको हो ।

आयल निगमसँग इन्धन भण्डारण पर्याप्त रहेको र निगमको निरन्तर दबाबपछि ट्यांकर चालक तेल भर्न रक्सौल गइसकेको अवस्थामा यातायात पनि सुचारु हुनुले भोलि शनिबारबाट तेल भर्न लाइन बस्नु नपर्ने निगमको भनाइ छ ।

शुक्रबार अपराह्न प्रधानमन्त्री तथा मन्त्रिपरिषद कार्यालयमा भएको वार्तामा सरकार र नेपाल स्वतन्त्र सवारी चालक संघर्ष समितिबीच ८ बुँदे सहमति भएपछि तेल सहज हुने वातावराण बनेको हो । यसअघि मुलुकी संहिताको बिरोध गर्दै गत मंगलबारबाट यातायात मजदुर आन्दोलनमा थिए जसको प्रभाव पेट्रोलियम ढुवानीमा परेको थियो ।

बुधबार आवश्यकताभन्दा केही कम परिमाण तेल पम्पमा पुगेकाले बिहीबारको आपूर्ति असहज बनेको थियो तर, शुक्रबार उपभोक्ताले आवश्यकताभन्दा बढी माग गर्दा पम्पमा लाइन लागेको थियो । जसका कारण निगमले तेल बाँड्न कोटा प्रणाली लागू गरेको थियो ।
यो पढ्नूहोस्
बाइकलाई ५ लिटर र कारलाई १५ लिटर 
यसैबीच निगमले शुक्रबार २ बजेसम्म ४ लाख ५० हजार लिटर पेट्रोल र ४ लाख ४० हजार लिटर डिजेल डिपोबाट पम्पसम्म पुगेको निगम प्रवक्ता वीरेन्द्र गोइतले बताए । “हामीसँग पर्याप्त स्टक छ, नआत्तिनोस्,” गोइतले बाह्रखरीसँग भने ।

निगमका अनुसार सामान्य अवस्थामा थानकोट डिपोले काठमाडौंको पेट्रोल माग ३ दिन  र डिजेल ६ दिन धान्ने क्षमता राख्छ । यसअघि चालक आन्दोलनका कराण बुधबार डिपोदेखि पम्पसम्मको तेल ढुवानी पनि प्रभावित भएको थियो । त्यस दिन २ लाख ५ हजार लिटर पेट्रोल र १ लाख १९ हजार लिटर डिजेलमात्र पम्प पुगेको थियो । 

काठमाडौंको माग दैनिक ६ लाख लिटर पेट्रोल र ५ लाख लिटर डिजेल हो । यसलाई पूर्ति गर्न निगमले बिहीबार साँझसम्म ५ लाख ९८ हजार लिटर पेट्रोल र ५ लाख लिटर डिजेल पम्पसम्म पुर्याए पनि पम्पमा दिनभरि लामो लाइन थियो ।

मुलुकी संहिताले चालकलाई तोकेको जेल सजायको विरोधमा यातायात ठप्प पारिएको थियो । राजधानीमा कुनै बाधा नभए पनि राजधानी बाहिर भने जनजीवन अस्तव्यस्त थियो । त्यही भएर डिपो आउने क्रममा रहेका करिब १० लाख लिटर पेट्रोलियम पदार्थ बाटैमा रोकिएको थियो ।

तेल ढुवानी भएपछि पम्पले कुनै बदमासी नगरेको तथा आवश्यकताभन्दा बढी माग नगरेको अवस्थामा शनिबारबाट तेल सहज उपलब्ध हुने निगमको दाबी छ । यसअघि सरकारबाट सवारी चालक संघर्ष समितिबाट प्राप्त ज्ञापनपत्रको कार्यान्वयनका लागि गृह, भौतिक पूर्वाधार तथा यातायात र कानुन, न्याय तथा संसदीय मामिलामा पठाइने, ट्राफिक संकेत र सडकको नियमित मर्मत गरी भौतिक अवस्था दुरुस्त राख्ने र राष्ट्रिय राजमार्गमा निश्चित दुरीमा ठूला सवारीका लागि व्यवस्थित पार्किङको व्यवस्था भौतिक पूर्वाधार तथा यातायात मिलाउने, सडक दुर्घटना हुँदा निष्पक्ष छानबिन गरी घटनामा दोषी देखिएका जोसुकैलाई कारबाही गर्ने सुनिश्चित गर्न–गराउन गृह र कानुन, न्याय तथा संसदीय मामिला मन्त्रालयले व्यवस्था मिलाउने प्रतिबद्धता प्राप्त भएसँगै आन्दोलनका कार्यक्रम फिर्ता भएका हुन् ।

सहमतिमा ट्राफिक प्रहरीको व्यवहार परिवर्तनका लागि गृहले आवश्यक व्यवस्था मिलाउने, ज्ञापनपत्रको बुँदा ९ मा उल्लेखित विषयमा निष्पक्ष छानबिन गर्ने, यस्तो छानबिनमा चालकको तर्फबाट प्रतिनिधित्व गराउने तथा आन्दोलन क्रममा थुनामा रहेका सबै सवारी चालकलाई शुक्रबारै रिहासमेत गरिने उल्लेख छ ।

सरकार र यातायात व्यवसायीबीच सहमति हुनअघि नै ट्यांकर चाालक रक्सौल डिपोबाट तेल ल्याउन तयार बनेका थिए । निगमको निरन्तर दबाब तथा ट्यांकर नै कब्जामा लिने चेतावनी दिएपछि ढुवानी पुनः सुरु भएको थियो ।