काठमाडौं । महानगरीय प्रहरी अपराध महाशाखाअन्तर्गतको स्याटलाइट युनिटमा कार्यरत एकजना सई स्वयं संलग्न रहेर वैदेशिक रोजगार व्यवसायीबाट असुल गरिएको डेढ करोड रुपैयाँको ठगी काण्ड भर्खरै सार्वजनिक भएको छ । तत्कालीन महाशाखा प्रमुख एसएसपी रणबहादुर चन्दका पालादेखि सुरु भएको स्याटलाइट  युनिटले विगतमा धेरै राम्रा काम गरेको भए पनि पछिल्लो घटनाका कारण उक्त युनिटको छवि बिग्रिन थालेको छ । 

उपत्यकामा कतै घटना घट्यो भने यसै युनिटको सहयोगमा अपराध अनुसन्धानको पहिलो चरण सुरु हुन्छ । स्याटलाइट टिमले अग्रसरता लिएका अधिकांश घटनाहरूको अनुसन्धान सफल भएको इतिहास छ । यस युनिटमा काम गर्ने प्रहरीहरू विशेष तालिमप्राप्त छन् । त्यो तालिम लिनेमा महाशाखाका सई सम्बत तामाङ पनि हुन् । उनै सम्बत तामाङले व्यापारी अपहण गरी पैसा असुल्ने योजना बनाएको र उनैको योजनाअनुसार वैदेशिक रोजगार व्यवसायी बद्री राईको अपहरण गरी सो रकम असुल गरिएको बुझिएको छ । राईको अपहरण गरी करिब डेढ करोडको कागज गराइएको थियो । 

तामाङलाई यो कामका लागि सादा पोसाकमा हिँड्ने सई सूर्यबहादुर थापाले सघाएका थिए भने यी दुई जना सईलाई अन्य दुई जना प्रहरीले सहयोग गरेका थिए । 

लगभग सेलाइसकेको यो घटना भर्खरै चर्चामा आएको छ । पीडित बद्री राईले आपूmलाई अपहरण गर्नेहरू प्रहरी नै भएको कुरा सुरुमा थाहा पाएका रहेनछन् । महानगरीय अपराध महाशाखाका डीएसपी अजय केसीले बाह्रखरीसँग कुरा गर्दै भने, ‘‘जब राईलाई प्रहरी भन्ने थाहा भयो, अनि मात्र यसको रहस्य खुल्यो ।

अपराध अनुसन्धानसम्बन्धी तालिम लिएका व्यक्ति नै यस्तो काममा संलग्न रहेको देखिनु लज्जास्पद छ ।’’ 
उनका अनुसार काभ्रेका अर्जुन लामाको योजनाअनुसार रकम असुलिएको, तर त्यस कामका वास्तविक योजनाकार तामाङ नै भएको प्रहरी अनुसन्धानबाट खुलेको छ ।