काठमाडौं । अख्तियार दुरुपयोग अनुसन्धान आयोगले काठमाडौंको भोटाहिटीस्थित साझा भण्डार सहकारी संस्था लिमिटेडका तत्कालीन अध्यक्ष जयकुमार खड्कासहित ६ जनाविरुद्ध भ्रष्टाचार मुद्दा दायर गरेको छ ।

सहकारीको जग्गा सस्तोमा बिक्रीवितरण गरी चार करोड चार लाख २४ हजार १८१ रुपैयाँ हानि नोक्सानी पुर्‍याएको भन्दै अख्तियारले बिहीबार उनीहरुविरुद्ध विशेष अदालत काठमाडौंमा मुद्दा दायर गरेको हो ।

अख्तियारले मुद्दा दायर गरेकामा सझा भण्डार सहकारी संस्था लिमिटेडका तत्कालीन अध्यक्ष जयकुमार खड्का, सञ्चालक समितिका तत्कालीन सदस्यहरु आत्माराम राजवंशी, सुवर्ण मानन्धर, लक्ष्मण थापा, भोलाप्रसाद न्यौपाने र सदस्यसचिव तथा महाप्रबन्धक अमर थापा रहेका छन् ।

उनीहरुविरुद्ध दायर गरिएको मुद्दामा चार करोड चार लाख २४ हजार १८१ रुपैयाँ बिगो दाबी गरिएको छ । उनीहरुले हाल वीरेन्द्रनगर नगरपालिका–८ को क्षेत्रफल ०–२–० को जग्गा र कोहलपुर गाविस–३ (क) को क्षेत्रफल ०–२–१७ को जग्गा बिनाआधार र कारण हचुवाको भरमा अत्यन्त कम मूल्यमा बिक्री गरेको ठहर अख्तियारले गरेको छ ।