काठमाडौं । प्रमुख प्रतिपक्ष दल नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले वर्तमान सरकारले राष्ट्रिय पुँजीपतिहरूलाई छानीछानी लखेटिरहेको आरोप लगाएका छन् ।
मिनबहादुर गुरुङ र यती होल्डिङ्सले राष्ट्रिय पुँजी निर्माणमा योगदान गरिरहेकाले उनीहरूमाथि सरकारले छानीछानी दुःख दिने काम गरेको ओलीको भनाइ छ ।
पार्टीको केन्द्रीय सहकारी तथा गरिबी निवारण विभागले आइतबार च्यासलमा आयोजना गरेको एक कार्यक्रममा ओलीले भ्रष्टाचार नियन्त्रण गर्ने नाममा दलाल पुँजीवादहरूले मुलुकमा तमासा देखाइरहेको बताए ।
"अहिलेको सरकारले राष्ट्रिय उद्योगपति छानीछानी लखेट्छ । त्यो मिनबहादुर गुरुङलाई किन समातेको, किन कारबाही गरेको ? ५/६ जनाले किनिसकेको जमिन, उसले धनीपुर्जा हेर्यो, भएको मान्छेसँग किन्यो त । अनि, सरकारी जमिनलाई आफ्नो बनाउने, आफ्नो बनाउन लाग्ने, आफ्नो बनाउन लगाउने भ्रष्टाचार गर्नेहरू त तिनीहरू हुन नि । ती ठूला कुरा गरेर हिँड्ने । अनि, अर्कोसँग धनीपुर्जा हेरेर मालमा गएर, भूमि सुधारमा गएर पास गरेको होला नि । सरकारी अड्डामा गएर पास गरेको होइन ? त्यसरी पास गरेर जग्गा किनेको मान्छे उसलाई किन त्यस्तो ? अनि, के मिनबहादुर गुरुङ भागेर हिँड्थ्यो ? अनि यो सबै सम्पती तिमीहरू खाऊ भनेर छोडेर हिँड्थ्यो ?," ओलीले भने ।
ओलीले राष्ट्रिय पुँजी निर्माणमा भूमिका खेलिरहेको यती होल्डिङ्सलाई पनि अहिलेको सरकारले खेदिरहेको बताए ।
"यती होल्डिङ्सलाई किन खेदेको ? यती होल्डिङलाई खेद्नेहरू दलाल पुँजीवादीहरू हुन् । त्यसकारण उनीहरू खेद्छन् । किनभने त्यो राष्ट्रिय पुँजी हो । सोलुको एउटा शेर्पा, भारी बोकेर हिँडथ्यो रे बच्चैदेखि । त्यस्तो शेर्पाले यहाँ आएर हवाईजहाज पनि उडाएको छ । पर्यटन पनि चलाएको छ । होटल पनि चलाएको छ । हेलिकप्टर पनि चलाएको छ । यसो गर्न पाइन्छ ? भारी बोकेर हिँड्ने शेर्पाले । यो त राष्ट्रिय पुँजीबाहेक हुनै सक्दैन । उसले विदेशमा लगेर स्विजरल्यान्डमा जम्मा गर्दैन । ऊसले माल्दिभसमा लादैन, श्रीलंका लादैन । बंगालदेश, भारत लाँदैन । मुम्बईमा होटल छैन । यस्ता देशैमा केही गर्छु भन्ने पनि चलाउन दिइन्छ ?," ओलीको प्रश्न थियो ।
-1749010126.jpg)
