काठमाडौं । नेपाल मुक्तक प्रतिष्ठानले मुक्तक दिवसको अवसरमा चर्चित साहित्यकार सरुभक्तलाई ५१ हजार रुपैयाँ राशिसहितको ‘भीमदर्शन मुक्तक पुरस्कार’ प्रदान गरेको छ । 

त्यस्तै, प्रतिष्ठानले २०७९ सालभरिमा प्रकाशित नेपाली मुक्तककृतिमध्ये उत्कृष्ट ठहरिएको सर्जक अनुराधा ढकालको ‘आरब्ध’लाई ३१ हजार रुपैयाँ नगदराशिसहित ‘कृष्ण–रत्न–चेतन मुक्तक पुरस्कार’ प्रदान गरेको छ । 

शुक्रबार प्रज्ञा प्रतिष्ठानमा आयोजित कार्यक्रममा प्रमुख अतिथि वरिष्ठ कवि बैरागी काँइलाले सर्जकहरूलाई पुरस्कार समर्पण गर्दै रत्नशम्सेर थापाको पहिलो मुक्तककृति ‘शीतको रुनझुन’ लोकार्पण गरेका थिए । उक्त दुवै पुरस्कार मुक्तक प्रतिष्ठानका अध्यक्ष रामकाजी कोनेले स्थापना गरेका हुन् ।

मुक्तक दिवसको अवसर पारेर सम्पन्न कार्यक्रममा मुक्तककारहरू दिनेश शर्मा, सुनिल अधिकारी, राजेन्द्र घिमिरे सागर, मदन नेपाल, निर्मलरमण पराजुलीलगायतले मुक्तक वाचन गरेका थिए ।