काठमाडौं । सर्वोच्च अदालतले नेपाल स्काउटको निर्वाचनका विषयमा भएका निर्णयका कागजात झिकाउन आदेश गरेको छ ।

न्यायाधीशहरू सपनाप्रधान मल्ल र डा. नहकुल सुवेदीको संयुक्त इजलासले आज निर्वाचन प्रक्रिया रोक्ने विषयमा प्रधानमन्त्रीबाट पुस १७ मा भएको निर्णय, प्रधानमन्त्री तथा मन्त्रिपरिषद् कार्यालयको पत्र र निर्वाचन समितिको निर्वाचन गराउन नसकिने निर्णय झिकाउन आदेश गरेको हो ।

यसअघि, यही माघ २३ गते न्यायाधीश टेकप्रसाद ढुंगानाको इजलासले अल्पकालीन आदेश जारी गर्दै अन्तरिम आदेशको छलफलका लागि दुवै पक्षलाई माघ २५ गते (बिहीबार) आउन भनेको थियो ।

बिहीबार न्यायाधीशहरू हरिप्रसाद फुयाल र सुनिलकुमार पोखरेलको इजलासमा परेको स्काउटको मुद्दा हेर्न नमिल्नेमा परेको थियो ।

शुक्रबार न्यायाधीहरू मल्ल र सुवेदीको इजलासले अन्तरिम आदेशबारे कुनै निर्णय गरेको छैन ।

स्काउटको निर्वाचन स्थगित भएपछि तदर्थ समितिका संयोजक तथा प्रमुख आयुक्त लोकबहादुर भण्डारीले माघ २१ गते मुद्दा दायर गरेका थिए ।