रोल्पाको सुनखानी उत्खनन गर्न सांसदको आग्रह

अर्थ व्यवसाय

रोल्पाको सुनखानी उत्खनन गर्न सांसदको आग्रह

शुक्रबार, चैत २, २०८०

रोल्पाको सुनखानी उत्खनन गर्न सांसदको आग्रह — फाइल तस्बिर ।

काठमाडौं । नेकपा (एमाले)की सांसद ईश्वरी घर्तीले रोल्पाको सुनखानी उत्खनन गर्न सरकारलाई आग्रह गरेकी छन् शुक्रबार प्रतिनिधिसभा बैठकको शून्य समयमा उनले त्यहाँ दुई सुनखानी रहेको बताइन् ।

“धेरै मान्छेले भन्नुहुन्छ– रोल्पामा सुनखानी छ रे, हो ? मैले भन्ने गर्छु– हो, रोल्पामा सुनखानी छ । दुईवटा सुनखानी दर्ता भएका छन्,” उनले भनिन्, “पहिला रोल्पालीहरूले त्यहीँको सुन चालेर प्रयोग गर्थे ।”

सरकारले उत्खनन नगर्दा सुनखानी अलपत्र परेको उनको भनाइ छ । त्यहाँबाट उत्खनन गर्न सके बाहिरबाट अवैध रूपमा आयात भइरहेको सुन रोकिने उनले उल्लेख गरिन् ।

“सरकारले त्यसको उत्खनन नगर्दा ती सुनखानीहरू अलपत्रजस्तै छन् । त्यसैले सुनछहरी, गामखोला, थगामखोलामा रहेका सुनखानी राज्यले तत्काल उत्खननको प्रक्रिया अगाडि बढाओस्,” उनले भनिन्, “बाहिरबाट अवैध रूपमा आयात भइरहेको सुन रोकियोस् ।”