काठमाडौं । सार्थक कार्कीको उपन्यास ‘इजाजतपत्र’ सार्वजनिक गरिएको छ । शनिबार काठमाडौंमा पूर्वमुख्यसचिव विमल कोइराला, समालोचक कुमारी लामा र समीक्षक एवं सम्पादक राजकुमार बानियाँले उक्त उपन्यासकृति लोकार्पण गरेका हुन् ।

नेपाल राष्ट्र बैंकमा कार्यरत कार्कीको यो पहिलो आख्यानकृति हो । उपन्यास ‘इजाजतपत्र’मा राज्यसंयन्त्रले जनतालाई सेवा दिँदा कति हैरान बनाउँछ भन्ने विषय सरल ढंगले उजागर गरिएको पूर्वमुख्यसचिव कोइरालाले बताए । उनले भने, “उपन्यासको विषयवस्तु मार्मिक छ, यो नेपाली साहित्यको उत्कृष्ट काव्याख्यान हो ।”

समालोचक लामाले नेपालको प्रशासनसंयन्त्रले नागरिकमाथि थोपरेको सास्तीलाई उपन्यासमा सुन्दर ढंगले चित्रण गरिएको बताइन् ।

समीक्षक एवं सम्पादक बाँनियाले ‘इजाजतपत्र’ पहिलो उपन्यास भईकन पनि कार्कीले नेपाली साहित्यलाई अब्बल आख्यान दिएको बताए ।

सांग्रिला बुक्सले प्रकाशन गरेको ‘इजाजतपत्र’को प्रतिमूल्य २९५ रुपैयाँ कायम छ ।