काठमाडौं । पत्रकार तथा उपन्यासकार बसन्त बस्नेतको दोस्रो उपन्यास ‘सिमसारा’ लोकार्पित भएको छ । वुधबार प्रज्ञा प्रतिष्ठानको डबलीमा आयोजित कार्यक्रममा कृतिकार बस्नेतसँगै चलचित्र निर्देशक मीन भाम, कवि अस्मिता गौतमलगायतले कृति सार्वजनिक गरे ।

कार्यक्रमका वक्ता निर्देशक भामले उपन्यासकार बस्नेतको लेखनीको प्रशंसा गर्दै साहित्यकार पारिजातको स्मरण गरे । उनले भने, "म पारिजातको प्रेममा लिप्त छु । मैले अहिलेसम्म पारिजातका साहित्यसँग प्रेम गरेँ । अहिले आएर म बसन्तजीको यो उपन्यास सिमसारासँग प्रेम गर्न थालेको छु ।"

अहिलेका चर्चित चलचित्र निर्देशक भामले पाठकीय टिप्पणी राख्दै सर्जकहरू आफ्ना सिर्जनामा युग युगान्तर बाँची रहने बताए ।

कार्यक्रममा आयोजित अन्तरसंवादमा कवि अस्मिता गौतमले उपन्यासकार बस्नेतसँग सवालजवाफ गरिन् ।

बस्नेतले आफूले लाहुरेहरूको जीवनलाई नजिकबाट नियालेको बताउँदै उपन्यासका पात्रहरूलाई भेट्दै गहिराइमा पुगेर लेखेको बताए ।

उक्त अवसरमा गायक उज्ज्वल सागरले कृति सार्वजनिकपूर्व सांगीतिक प्रस्तुति दिए । 

उपन्यास सिमसारा फाइनप्रिन्टले प्रकाशित गरेको हो । बस्नेतको यसअघि ‘७२ को विस्मय’ र उपन्यास ‘महाभारा’ प्रकाशित छ ।