काठमाडौं । नेपाल प्रज्ञा प्रतिष्ठानले नेपाल स्रष्टा समाजसँगको सहकार्यमा ‘समकालीन नेपाली उपन्यासका स्वर तथा प्रकाश तिवारीको उपन्यास ‘९६ गड्डी’ माथि अन्तरक्रियात्मक कार्यक्रम गरेको छ ।
बुधबार प्रतिष्ठानको सभाकक्षमा आयोजित कार्यक्रममा सदस्यसचिव डा. धनप्रसाद सुवेदी, समीक्षकद्वय राजकुमार बानियाँ तथा अनिता कोइरालाले उपन्यासको समकालीन अवस्था र उपन्यासकार तिवारीको उपन्यासमाथि आफ्नो दृष्टिकोण राखे ।
प्रतिष्ठानका सदस्यसचिव डा. सुवेदीले आलोचनात्मक यथार्थवाद नै समकालीन उपन्यासको मूल भएको बताए । उनले पछिल्लो समय उपन्यास धेरै लेखिए पनि कम पढिएको चर्चा गर्दै उनले लेखकले यथार्थप्रति इमानदार हुनुपर्नेमा जोड दिए ।
समीक्षक अनिता कोइरालाले ‘९६ गड्डी’ उपन्यासको चर्चा गर्दै कृतिको विषयवस्तु नेपालमा सर्वत्र व्याप्त भ्रष्टाचार रहेको बताउँदै यस उपन्यासले भ्रष्टाचारको साङ्गो पाङ्ग नाङ्गो रूप देखाएको उल्लेख गरिन् । उनले यो पढ्नै पर्ने उपन्यास भएको बताइन् ।
अर्का वक्ता समीक्षक राजकुमार बानियाँले नेपाली उपन्यासको संख्या ६ हजारभन्दा माथि पुगिसकेको हुनसक्ने भन्दै पढ्नलायक उपन्यास एक सयवटा पनि नभएको बताए । उपन्यासको क्यानभास ठूलो हुने र त्यसमा लेखकले धेरै स्वतन्त्रता पाउने भएकोले सबै उपन्यासतिर आकर्षित भएको हुनसक्ने उनले बताए ।
बानियाँले ‘९६ गड्डी’को चर्चा गर्दै उपन्यासका सवल र केही कमजोर पक्षको चर्चा गरे ।
कार्यक्रममा प्रतिष्ठानका कुलपति भूपाल राईले उपन्यासको चर्चा गर्दै नेपाली समाजको सबैभन्दा ठूलो दुस्मन भ्रष्टाचार नै भएको उल्लेख गर्दै भ्रष्टाचारविरुद्धका उपन्यास अझै धेरै लेखिनुपर्नेमा जोड दिए ।
स्रष्टा समाजका अध्यक्ष श्रीओम रोदनले वर्तमान लेखनीको चर्चा गर्दै यस क्षेत्रमा पनि भ्रष्टाचार हुँदै आएको बताए । उनले नेपालमा अरूलाई लेख्न लगाएर (घोस्ट राइटिङ) आफ्नो नाममा पुस्तक निकाल्ने प्रचलन व्याप्त रहेकोले यो पनि एक किसिमको ठूलो भ्रष्टाचार नै भएको बताए ।
कार्यक्रममा प्राज्ञ अमर न्यौपाने, ९६ गड्डीका उपन्यासकार प्रकाश तिवारीले बोलेका थिए ।
-1749010126.jpg)
