काठमाडौं । काठमाडौंको ग्रामीण आदर्श बहुमुखी क्याम्पसमा स्वतन्त्र विद्यार्थी युनियन (स्ववियु) चुनाव माग गर्दै नेपाल विद्यार्थी संघ (नेविसंघ)ले रिले अनशन थालेको छ । पहिलो दिन नेविसंघबाट स्ववियु सभापतिका उमेदवार सुल्तान मियाँ रिले अनशनमा बसेका छन् ।

त्रिभुवन विश्वविद्यालयले यही चैत ५ गतेका लागि तोकेको स्ववियु निर्वाचनमा सबै तयारी पूरा हुँदासमेत विभिन्न बहानामा निर्वाचन रोकिएको क्याम्पसका इकाइ अध्यक्ष महेशमणि पौडेलले बताए ।

“हाम्रो संगठनले जित्ने देखिएपछि विभिन्न बहानामा निर्वाचन नगराउने प्रपञ्च रचिएको छ,” अध्यक्ष पौडेलले भने, “हामी स्ववियु निर्वाचन सुनिश्चित हुने गरी कार्यतालिका सार्वजनिक गर्न र निर्वाचन निर्देशिका कार्यान्वयन गर्दै विद्यार्थीको मताधिकार सुनिश्चित गर्न माग गर्दछौँ ।”

सभापतिका उमेदवार मियाँले रिले अनशनबाट पनि माग सम्बोधन नभए आमरण अनशनमा बस्न बाध्य हुने बताए ।