काठमाडौं । नइ प्रकाशनले नेपाल तथा भारतका २८ जना विभिन्न व्यक्तित्वलाई ताम्रपत्र तथा नगद राशिसहित २०८० सालको नइ पुरस्कार प्रदान गरेको छ ।   

शुक्रबार काठमाडौंमा आयोजित कार्यक्रममा नइ प्रकाशनकी प्रमुख इन्दिरा प्रसाईंले अध्यात्म दर्शन र सनातन धर्मसंस्कृतिको जागरणमा समर्पित प्रा.चेतोनाथ शर्मा आचार्यलाई एक लाख नगद राशिसहित ‘नइ चन्द्रधन पुरस्कार’ प्रदान गरिन् ।

कार्यक्रममा नेपाली वाङ्मयको श्रीवृद्धिमा सक्रिय, नेपाली भाषासाहित्यको अन्तर्राष्ट्रिय विस्तारमा महत्वपूर्ण योगदान पुर्‍याउने भारतका प्राज्ञ के.वी. नेपालीलाई दुई लाख रुपियाँ राशिसहित ‘नइ देरुनीख अन्तर्राष्ट्रिय पुरस्कार’ प्रदान गरियो ।

उक्त अवसरमा भारतीय साहित्यकार डा. जीवन नामदुङलाई ‘नइ ईश्वर बराल पुरस्कार’, भारतका संगीतकर्मी रञ्जित गजमेरलाई ‘कोइलीदेवी पुरस्कार’, भारतीय साहित्यकार डा. शान्ति क्षेत्रीलाई ‘नइ गणेशदुर्गा अन्तर्राष्ट्रिय पुरस्कार’ प्रदान गरियो । यी पुरस्कारहरूका साथ जनही एक एक लाख नगद राशि प्रदान गरियो ।

कार्यक्रममा संस्कृति विज्ञ हरिराम जोशीलाई ‘नइ भूपालदुर्गा पुरस्कार’, प्रा.डा. मोहन लोहनीलाई ‘नइ कीर्तिनिधि पुरस्कार’, साहित्यकार प्रा. गोपीकृष्ण शर्मालाई ‘नइ देरुनीख सुकीर्ति पुरस्कार’, संचारकर्मी कमल प्रधान र ध्रुव थापालाई संयुक्त रूपमा ‘नइ भाजप पुरस्कार’, न्युरो सर्जन डा. वसन्त पन्तलाई ‘नइ भावि पुरस्कार’, सहित्यकार रञ्जुश्री पराजुलीलाई ‘नइ रेखा पुरस्कार’, पर्वतका सहित्यकार शान्तिनारायण श्रेष्ठलाई ‘नइ धनरूप पुरस्कार’ र विराटनगरकी सहित्यकार राधिका गुरागाईंलाई ‘नइ बुलु शर्मा पुरस्कार’ प्रदान गरिएको नइ प्रकाशनका सदस्य सचिव नरेन्द्रराज प्रसार्ईंद्वारा प्रेषित विज्ञप्तिमा उल्लेख छ । यी पुरस्कारहरूका साथ नगद राशि जनही एक एक लाख रूपैयाँ पनि प्रदान गरिएको छ ।

त्यस्तै, ६० हजार रुपैयाँ नगद राशिसहित ‘नइ देरुनीख प्रदीप्ति पुरस्कार’ पाल्पाका साहित्यकार कृष्णप्रसाद बस्याललाई प्रदान गरियो । साथै, जनही ५०/५० हजार रुपैयाँ राशिको ‘नइ कपिल शोध पुरस्कार’ साहित्यकार ठाकुर शर्मा भण्डारी, ‘नइ देरुनीख गौरव पुरस्कार’ झापाका साहित्यकार धनकुटे कान्छा, ‘नइ रामलक्ष्मी पुरस्कार’ तेस्रो लिंगी रजनी थकालीलाई प्रदान गरियो । त्यस्तै २५ हजार नगद राशि सहितको ‘नइ देरुनीख पौरख पुरस्कार’ झापाकी मनीषा राजवंशीलाई मिस हेरिटेज पेटाइट युनिभर्स भएवापत प्रदान गरियो ।

कार्यक्रममा ६ बालबालिकालाई १० हजार रुपियाँ राशिको ‘नइ देरुनीखपू बाल पुरस्कार’ प्रदान गरियो । पुरस्कृत हुनेहरूमा बहुआयामिकतर्फ कुशाग्र भट्टराई, साहित्यतर्फ प्रतिष्ठा केसी, चित्रकलातर्फ श्रीया गुरुङ, गायनतर्फ सानवी यादव, नृत्यतर्फ अनिका महर्जन र खेलकुदतर्फ सुप्रिया ऐर छन् ।

त्यस्तै, सात हजार रुपैयाँ नगद राशिसहित ‘नइ कोपिला गायन पुरस्कार’ काव्या शिवाकोटी र ‘नइ कोपिला नृत्य पुरस्कार’ सुधा तामाङलाई तथा पाँच हजार रुपैयाँ नगद राशिको ‘नइ चिचिला पुरस्कार’ तीन वर्षीया मानषी भण्डारीलाई प्रदान गरिएको सदस्य सचिव प्रसाईंले जनाएका छन् ।