काठमाडौं । सरकारले तोकेअनुसार न्यूनतम पारिश्रमिक नदिएर श्रम शोषण भएको भन्दै निजी मेडिकल कलेजका आवासीय डाक्टरहरूले बुधबार पनि काठमाडौंमा प्रदर्शन गरेका छन् ।

आवासीय डाक्टरलाई सेवा सुविधा दिने निर्णय मन्त्रिपरिषद्‍बाटै भए पनि कार्यान्वयन नभएको भन्दै उनीहरूले बुधबार काठमाडौंको माइतीघरमा प्रदर्शन गरेका हुन् ।

उनीहरूले चिकित्सा आयोगद्वारा निर्धारित आठौँ तहको तलब संरचना कार्यान्वयन र शैक्षिक प्रगतिको संरक्षणका लागि पहल गर्न सरकारसँग माग गरेका छन् ।

त्यस्तै, आवासीय डाक्टरहरूले आयोगले आठौँ तहको तलब संरचना पारित गरेको दुई महिना बढी हुँदा पनि मेडिकल कलेजहरूले निर्देशनको पालना गरेकाले आन्दोलनमा उत्रिनुपरेको जनाएका छन् ।

उनीहरूले कलेज प्रशासनको योजनाबद्ध बेवास्ताले आफ्ना अधिकार सुनिश्चित गर्न प्रदर्शनमा आउनुपरेको जनाएका छन् । आफ्ना मागमा सरोकारवाला निकायले गम्भीरता नदेखाए थप आन्दोलनका कार्यक्रम घोषणा गर्ने चेतावनी आवासीय डाक्टरहरूले दिएका छन् ।