काठमाडौं । रिलायन्स स्पिनिङ मिल्सको आईपीओ निष्कासन प्रक्रिया अगाडि बढ्ने भएको छ । पाटन उच्च अदालतले अन्तरिम आदेश जारी गरेसँगै कम्पनीको आईपीओ प्रक्रिया अगाडि बढ्ने बाटो खुलेको हो ।

न्यायाधीशद्वय मुनेन्द्रप्रसाद अवस्थी र टीकाराम आचार्यको इजालसले बुधबार अन्तरिम आदेश जारी गरेको हो । रिलायन्सको तर्फबाट वैशाख ११ गते आईपीओ निष्कासनको प्रक्रिया अगाडि बढाउन माग गर्दै रिट दायर भएको थियो ।

कम्पनीले सार्वजनिक निष्कासनसम्बन्धी सम्पूर्ण प्रक्रिया पूरा गरी बोर्डबाट विवरण पत्र प्रकाशनको लागि स्वीकृति समेत प्राप्त गरेको थियो । तर, बोर्डले ०८१ असार २६ को आईपीओ निष्कासन स्थगित गर्न बिक्री प्रबन्धक ग्लोबल आइएमई क्यापिटललाई पत्र पठाएको थियो ।

यसरी बोर्डले पत्र काटेपछि ०८१ साउन १४ मा रिलायन्सको आईपीओ निष्कासन प्रक्रिया रोक्नुपर्ने आदेश माग गरी उच्च अदालत पाटनमा रिट दायर भएको थियो । सो रिट ०८१ कात्तिक २१ मा खारेज भएको थियो । 

यो रिट खारेज भएपश्चात् विनाआधार, कारण, तथा अख्तियारी  आईपीओ निष्कासन प्रक्रिया रोक्का गरेको भन्दै कम्पनीले पाटन उच्च अदालतमा वैशाख ११ गते रिट दायर गरेको थियो । सो रिटमा पाटन उच्च अदालतले अन्तरिम आदेश दिएको छ । 

प्रारम्भिक रूपमा नै कानुनसम्मत नदेखिएकोले सो रिट निवेदनको टुंगो नलागेसम्म उक्त रोक्का पत्र कार्यन्वयन नगर्नू÷नगराउनू र उक्त पत्रसँग सम्बन्धित सबै कार्य रोक्का राख्नू भनी अन्तरिम आदेश जारी भएको कम्पनीले जनाएको छ ।

सार्वजनिक लेखा समितिले ०८१ असार २५ गते बोर्डलाई रिलायन्सको आईपीओप्रति उठेका विषय स्पष्ट पार्न पत्र पठाएपछि अर्काे निर्णय नभएसम्म बोर्डले आईपीओ निष्कासन प्रक्रिया स्थगित गरेको थियो ।

कम्पनीले वैदेशिक रोजगारीमा गएका नेपालीलाई गत वर्षको असार २७ गतेबाट आईपीओ निष्कासन गर्न लागेको थियो । बोर्डको पत्रपछि कम्पनीको आईपीओ निष्कासन स्थगित गरेको थियो ।

कम्पनीले बुक बिल्डिङ विधिमार्फत प्रतिकित्ता ८२० रुपैयाँ ८० पैसामा वैदेशिक रोजगारीमा गएका नेपालीलाई आईपीओ जारी गर्न लागेको थियो ।

लेखा समितिले सात दिनभित्र रिलायन्सको आईपीओका विषयमा स्पष्ट पार्न भनेको थियो । कम्पनीले समितिलाई जवाफ पनि पठाइसकेको छ ।

०५४ मा स्थापना भएको रिलायन्स स्पिनिङ्स मिल्सले स्थापनाको २७ वर्षसम्ममा चार हजारभन्दा बढीलाई प्रत्यक्ष रोजगारी दिइरहेको बताइएको छ । साथै लगानी पनि बढेर १५ अर्बभन्दा बढी पुगिसकेको छ ।

यस उद्योगले नेपालको धागोको मागलाई पूर्ति गर्दै भारत, टर्कीलगायत थुप्रै मुलुकमा निर्यात पनि गर्दै आएको छ । 

सुनसरीमा रिलायन्सको धागो कारखाना रहेको छ । यस उद्योगले ऊन (उल) धागो, सुती (कटन) धागो, पोलिस्टर धागो, एक्रेलिक धागो, भिस्कोस धागो उत्पादन गर्दै आएको छ । कम्पनी बुक बिल्डिङ विधिबाट आईपीओ जारी गर्ने प्रक्रियामा समेत रहेको छ ।

कम्पनीले केही वर्षदेखि नै वैकल्पिक ऊर्जा व्यवस्थापन र प्रयोग समेत गर्दै आइरहेको छ । आफ्नै सोलार प्यानलमार्फत ऊर्जा व्यवस्थापन गर्दै आइरहेको हो ।

रुफटपमा राखिएको सोलार प्यानलले नौ मेगावाट विद्युत् उत्पादन गरिरहेको छ । विगतदेखि नै अघोषित लोडसेडिङ भइरहने गरेकाले उद्योगले वैकल्पिक ऊर्जा व्यवस्थापन गरेको बताइएको छ ।