काठमाडौं । आगामी वर्ष जापानमा आयोजना हुने २०औँ एसियाली खेलकुद (एसियाड)मा नेपाल ओलम्पिक कमिटी (एनओसी) र युवा तथा खेलकुद मन्त्रालयले फरक–फरक रूपमा खेल दर्ता गराएका छन् । एनओसीले मंगलबार पत्रकार सम्मेलनको आयोजना गर्दै कुल ३० खेललाई २०औँ एसियाली खेलकुदमा दर्ता गरिएको जनाएको हो ।

एनओसीका अध्यक्ष जीवनराम श्रेष्ठले २०औँ एसियाली खेलकुदका लागि सहभागिता जनाउन चाहेको खेलको संख्या र नाम दर्ता गराउने समयसीमा सोमबार सकिएको बताए । त्यसअघिसम्म युवा तथा खेलकुद मन्त्रालय र राष्ट्रिय खेलकुद परिषद्लाई पटक–पटक पत्राचार गरे पनि बेवास्ता गरेको उल्लेख गरे ।

एनओसीले ओसीए तथा स्थानीय आयोजकले तोकेअनुसारको समयसीमाभित्र दर्ता गराएका ३० खेलको सूचीमा एथ्लेटिक्स, आर्चरी, ब्याडमिन्टन, बास्केटबल, बक्सिङ, ब्रेकिङ एन्ड डान्स स्पोर्ट्स, बेसबल तथा सफ्टबल, र्‍याफ्टिङ तथा कनोइङ, कुराँश, क्रिकेट, साइक्लिङ, इ स्पोर्टस, गल्फ, हक्की, जुडो, कबड्डी, कराँते, मोडर्न पेन्ट्राथलन, रग्बी, स्केटबोर्ड तथा स्केटिङ, स्पोर्ट क्लाइम्बिङ, स्क्वास, सफ्ट टेनिस, पौडी, टेनिस, टेबल टेनिस, भलिबल, भारोत्तोलन, कुस्ती र उसु छन् । 

निर्वाचनसम्बन्धी विवादलाई लिएर सरकारले एनओसीलाई अवैधानिक भन्दै आएको छ । सरकारले एनओसी मुख्यालयमा ताल्चा मार्नुका साथै एनओसी पदाधिकारीहरूलाई विदेश भ्रमणमा समेत रोक लगाएको छ ।

यता, ओलम्पिक कमिटीले पत्रकार सम्मेलनमार्फत एसियाडमा सहभागिता जनाउने खेल संख्या सार्वजनिक गरेलगत्तै युवा तथा खेलकुद मन्त्रालयले एक विज्ञप्ति जारी गर्दै ३१ खेल दर्ता गरिसकेको जनाएको हो । 

मन्त्रालयले सरकारबाट अवैध घोषणा भइसकेको ओलम्पिक कमिटीले लेटरप्याड र छापको दुरुपयोग गरेको समेत बताएको छ ।