नयाँ दिल्ली । भारतको १५औँ राष्ट्रपतिको रुपमा द्रौपदी मुर्मूले शपथ ग्रहण गरेकी छन् । शपथ ग्रहणपछि राष्ट्रका नाममा सम्बोधन गर्दै मुर्मूले सोमबार भारतले स्वतन्त्रताको ७५ वर्ष पूरा गरिरहेको बेला पदभार सम्हाल्न पाउँदा आफू सम्मानित भएको बताएकी छन् ।

स्वतन्त्र भारतमा जन्मने आफू पहिलो राष्ट्रपति भएको उनले जानकारी दिइन् । संसदमा आफ्नो स्वीकृति भाषणमा मुर्मूले भनिन्, “राष्ट्रपति पदमा पुग्नु मेरो व्यक्तिगत उपलब्धि होइन, यो भारतका हरेक गरिबको उपलब्धि हो । मेरो चुनाव भारतका गरिबहरूले सपना मात्रै होइन, ती सपनाहरू पूरा गर्न पनि सक्छन् भन्ने प्रमाण हो ।”

मुर्मूको शपथ ग्रहण समारोहलाई विशेषगरी ‘भारतका गरिब, सीमान्तकृत र दलितहरूका लागि भावनात्मक क्षण’भन्दै प्रधानमन्त्री नरेन्द्र मोदीले राष्ट्रपतिलाई उनको कार्यकालका लागि शुभकामना दिए । 

शपथ ग्रहणपछिको सम्बोधनमा मोदीले राष्ट्रपति मुर्मूले आशा र करुणाको सन्देश दिएको भारतीय समाचार संस्था इण्डियन एक्स्प्रेसले जनाएको छ ।