काठमाडौं । रुसी राष्ट्रपतिका प्रवक्ता दिमित्री पेस्कोभले इजरायल र इरानबीचको युद्धमा अमेरिकी हस्तक्षेपले 'अर्को भयानक तनाव' बढाउने बताएका छन् । रुसी समाचार एजेन्सी ताससँग कुरा गर्दै उनले सो कुरा बताएका हुन् ।

यस द्वन्द्वमा अमेरिका र रुसले फरक–फरक पक्षलाई समर्थन गरिरहेका छन् । अमेरिकी राष्ट्रपति डोनाल्ड ट्रम्पले इरानबाट 'बिनाशर्त आत्मसमर्पण'को माग गरिरहेका छन् । इरानमाथि आक्रमण गर्ने विचार गरिरहेको बताइएको छ । अर्कोतर्फ, रूसले इरानलाई एक प्रमुख सहयोगीको रूपमा हेर्छ ।

यस वर्ष रुसी राष्ट्रपति भ्लादिमिर पुटिनले इरानी राष्ट्रपति मसूद पेजेश्कियानसँग रणनीतिक साझेदारीमा हस्ताक्षर गरे । सम्झौतामा दुवैले रक्षा सहयोग विकास गर्न चाहेको उल्लेख छ ।

इरानले रुसलाई शाहेद ड्रोन पनि उपलब्ध गराएको छ । युक्रेनविरुद्धको रुसको युद्धमा यसले महत्त्वपूर्ण भूमिका खेलेको छ । रुसी विदेश मन्त्रालयले इजरायली आक्रमणको निन्दा गरेको छ र त्यसलाई बिनाकारण गरिएको भनेको छ ।

बुधबार, रुसी उपविदेशमन्त्री सर्गेई र्याबकोभले अमेरिकालाई इजरायललाई सैन्य सहायता प्रदान नगर्न आह्वान गरे ।

उनले भने, "यसले सम्पूर्ण परिस्थितिलाई नाटकीय रूपमा अस्थिर बनाउनेछ ।"

इजरायल र इरानबीचको द्वन्द्वका कारण रुस र अमेरिकाबीच पनि तनाव देखिएको छ ।

ट्रम्प फेरि सत्तामा आएपछि, अमेरिकाको रूससँगको सम्बन्धमा सुधारको चर्चा भएको थियो तर इजरायल र इरानबीचको जारी द्वन्द्वका कारण परिस्थिति द्रुत गतिमा परिवर्तन भइरहेको देखिन्छ ।