काठमाडौं । आर्थिक वर्ष २०८०÷८१ को बजेट वक्तव्य सुर्तीजन्य पदार्थलाई संरक्षण र प्रवद्धन गर्ने गरी आएको भन्दै तत्काल सच्यानुपर्ने माग भएको छ । सुर्तीजन्य पदार्थको प्रयोग नियन्त्रणमा लामो समयदेखि कामा गर्दै आएको ‘एक्सन नेपाल’ नामक संस्थाले यस्तो माग उठाएको हो ।

“बजेटमा २.५ देखि ४ प्रतिशतसम्म मात्रै कर वृद्धि गरेको देखिए पनि मुद्रास्फीति दर ७.८ प्रतिशतले वृद्धि हुँदा करको दर घट्ने देखिएको छ । यो पछिल्लो १० वर्षयताकै न्यून हो,” एक्सन नेपालले जारी गरेको विज्ञप्तिमा उल्लेख छ ।

वार्षिक २७ हजार बढी नागरिकको ज्यान लिइरहेको सुर्तीजन्य पदार्थलाई नियन्त्रण गर्नुको साटो संरक्षण गर्ने भएकाले बजेट तत्काल सच्याउनुपर्ने एक्सन नेपालका अध्यक्ष आनन्दबहादुर चन्द बताउँछन् ।

नेपालमा हाल सुर्तीजन्य पदार्थमा कर दक्षिण एसियाकै सबैभन्दा कम ३३.२५ प्रतिशत रहेको छ । स्वास्थ्य तथा जनसंख्यामन्त्री मोहनबहादुर बस्नेतले केही दिनअघि जेनेभामा भएको डब्लूएचओको ७६औँ महासभामा सुर्तीजन्य पदार्थको कर समयानुकूल बढाउने प्रतिवद्धता जनाएका थिए ।

मन्त्री बस्नेतले सुर्तीजन्य पदार्थमा कर बढाएर डब्लूएचओको मापदण्ड नजिक पु¥याउने विषयलाई आफ्नो पहिलो प्राथमिकतामा राखेको पटकपटक बताउँदै आएका छन् । डब्लूएचओको मापदण्डमा सुर्तीजन्य पदार्थमा करको दर ७५ प्रतिशत छ ।