काठमाडौं । सहकारीपीडित बचतकर्ता महासंघ संघर्ष समितिको अगुवाइमा बचत फिर्ताको माग गर्दैै विरोध प्रदर्शन गरिएको छ ।

सहकारीबाट ठगिएका पीडित एक हुँदै त्यहाँ राखेको बचत सरकारले फिर्ता गरिदिनुपर्ने मागसहित शनिबार काठमाडौंको माइतीघरदेखि बानेश्वरसम्म प्रदर्शन गरेका हुन् ।

सहकारीले खाएर भागेको बचत फिर्ताका लागि स्थानीय तहदेखि केन्द्र सरकारका निकायको ढोकामा पुग्दा समेत बचत फिर्ता नभएको भन्दै धर्ना तथा प्रदर्शनमा उत्रिएको उनीहरूले बताए ।

संघर्ष समितिका अध्यक्ष सुनितासिंह राजभण्डारीले सहकारीको बचत फिर्ताका लागि राज्यका सबै निकाय धाउँदा पनि कतैबाट सहयोग नपाएको बताइन् । त्यसपछि पीडित संयुक्त रूपमा सडक आन्दोलनमा उत्रिएको उनले उल्लेख गरिन् ।

सहकारीलाई नियन्त्रण गर्ने एउटा मात्र निकाय बनाउनुपर्नेमा उनले जोड दिइन् । अहिले १०० भन्दा बढी सहकारीमार्फत ठगिएका बचतकर्ता एक ठाउँमा रहेको उनले बताइन् ।