भक्तपुर । युरोप, दक्षिण तथा पश्चिम एसियाको रैथाने पन्छी ‘लेसर ग्रे स्राइक’ पहिलोपटक भक्तपुरको मनोहरामा देखिएको छ ।

तापक्रम वृद्धिसँगै गर्मी भेगमा मात्र हुने यो पन्छी असार लागेपछि भक्तपुरको मनोहरास्थित ‘मिनि कोसीटप्पु’मा भेटिएको चरा अन्वेषणकर्ता सञ्जय थाश्रेष्ठले जानकारी दिए । यो चरा काठमाडौं उपत्यकामा पहिलोपटक भक्तपुरको मनोहरामा देखिएको उनले बताए ।

पन्छी पथप्रदर्शक शंकर तिवारीले मनोहरामा लेसर ग्रे स्राइक भेटेपछि तस्बिर कैद गर्दै काठमाडौं उपत्यकासँगै नेपालको पहाडी भेगका निम्ति पहिलो अभिलेख गरिएको जानकारी दिए ।

नेपालमा पहिलोपटक गत वर्षको वैशाख अन्तिम साता राष्ट्रिय प्रकृति संरक्षण कोषका वन्यजन्तु प्राविधिक देवराज जोशीले शुक्लाफाँटा राष्ट्रिय निकुञ्जको पूर्वीतटीय क्षेत्रमा यो चरा देखेका थिए । यो चरालाई राष्ट्रिय एवं अन्तर्राष्ट्रिय विज्ञको टोलीले नेपालका निम्ति पहिलो भएको पुष्टि गरेका पन्छी अनुसन्धानकर्ता थाश्रेष्ठले जानकारी दिए ।

गौँथलीझैँ देखिने, निधार र टाउकोमा कालो रङ तथा कालो पखेटाको मध्य भागमा सेतो रङ हुने र लामो दूरीसम्म उड्न सक्ने यो चरा भक्तपुरमा असार लागेपछि जोडी नै देखिएको उनले बताए । योसँगै मनोहरामा पन्छीका करिब ३०० प्रजाति अभिलेख भएका छन् ।

युरोप र पश्चिम एसियाका पानी कम पर्ने स्थान, मरुभूमि आसपासका क्षेत्र र भारतको राजस्थान, पाकिस्तान, अफगानिस्तानका सुक्खा भेगमा लेसर ग्रे पाइने उनले जानकारी दिए ।

एक महिनाअघि मनोहरामा ‘जल कुखुरा’ पनि देखिएको थियो । नेपालका अरू भेगमा प्रायः नपाइने ‘ठूलो कस्दरी’ जलपन्छी ०७९ भदौमा, सोही वर्ष भदौमै मनोहरामा ‘सेतो पंखे फ्यालफ्याले’ र ०७८ असोज अन्तिम साता मनोहरा खोला किनारमा १९२ वर्षपछि पानी गौँथली देखिएको अनुसन्धानकर्ता थाश्रेष्ठले जानकारी दिए । रासस