काठमाडौं । संवैधानिक निकायका नियुक्त गरिएका ‘असंवैधानिक’ पदाधिकारीविरुद्धको रिटमा आज सुनुवाइ हुँदै छ । रिटको सुनुवाइ सर्वोच्च अदालतको संवैधानिक इजलासमा भइरहेको छ ।

इजलासमा प्रधानन्यायाधीश प्रकाशमानसिंह राउत, न्यायाधीशहरू सपनाप्रधान मल्ल, मनोजकुमार शर्मा, कुमार चुडाल र नहकुल सुवेदी छन् । इजलासले गत माग ३० गतेदेखि नै यस रिटलाई हेर्दाहेर्दैमा राखेको छ । 

वर्तमान प्रधानमन्त्री केपी शर्मा ओलीको तत्कालीन नेपाल कम्युनिस्ट पार्टी (नेकपा) सरकारले संविधानको व्यवस्था नै संशोधन हुने गरी संवैधानिक परिषद्सम्बन्धी अध्यादेश जारी गरेर नियुक्ति सिफारिस गरेको थियो । उक्त निर्णयविरुद्ध अधिवक्ता ओमप्रकाश अर्याल, वरिष्ठ अधिवक्ता दिनेश त्रिपाठीसहितले दायर गरेको रिटमा चार वर्षपछि सुनुवाइ प्रक्रिया अघि बढेको हो । 

सर्वोच्चका तत्कालीन प्रधानन्यायाधीश चोलेन्द्रशमशेर जबराले नियुक्तिमा भाग लिएको आरोप लागेपछि रिटमाथिको सुनुवाइमा अवरोध सिर्जना भएको थियो । उनीपछि कामु प्रधानन्यायाधीशमा दीपकुमार कार्की आएपछि संवैधानिक इजलास गठन गरेर सुनुवाइ थालिए पनि रिटको टुंगो लागेको छैन ।