काठमाडौं । राष्ट्रप्रमुख, प्रधानमन्त्री र राज्यका उच्च ओहोदामा रहेका हरेक व्यक्तिको सम्पत्ति छानबिनको माग राख्दै नेकपा (बहुमत)ले आन्दोलनको घोषणा गरेको छ । मंगलबार काठमाडौंमा सो पार्टीको ३ नम्बर ब्युरोले पत्रकार सम्मेलनको आयोजना गरी आफ्नो मागको सुनुवाई नभए कडा आन्दोलनको चेतावनी समेत दिएको छ ।

पार्टीका ३ नम्बर ब्युरो इन्चार्ज उदयबहादुर चलाउने ‘दीपक’ले देशको मुख्य दुस्मन भ्रष्टाचार रहेको र उच्च ओहोदाका व्यक्ति नै त्यसको कारक भएको आरोप लगाएका हुन् । पार्टीका स्थायी समिति सदस्यसमेत रहेका चलाउनेले आगामी चैत २४ गतेदेखि वैशाख ९ गतेसम्म सम्पत्ति छानबिनका लागि राजधानीको माइतीघर मण्डलामा धर्ना दिने घोषणा गरे ।

देशलाई समृद्ध तथा जनताको जीवनस्तर माथि उठाउन प्रत्येक उच्चपदस्थ व्यक्तिहरुको सम्पत्ति छानबिन गरेर राज्यकोष अपचलन गरेको पुष्टि भए त्यसलाई राष्ट्रियकरण गरिनुपर्ने धारणा राखे । चलाउनेले कुलमान घिसिङलाई बर्खास्त गरिनुको मुख्य कारण पनि मन्त्रीले चलखेल गर्न नपाएको आरोप लगाउँदै भने, “ऊर्जामन्त्री दीपक खड्का जल तथा विद्युत व्यवसायी भएको र त्यसमा घिसिङले चलखेल गर्न नदिएपछि हटाए ।” 

“यसरी राज्यका उच्च पदस्त व्यक्तिहरुको कुदृष्टि नै राज्यकोषमा भएपछि देश बन्छ ? भ्रष्टाचारको मुहान नै यस्तै व्यक्ति भएपछि जनताको समृद्धि सम्भव छ ?” चलाउनेले प्रश्न गरे । पार्टीका केन्द्रीय सदस्य तथा ललितपुर जिल्ला इन्चार्ज कुमाल सिलवालले भ्रष्टाचारको जालो तोड्न आफूहरूले आन्दोलनको घोषणा गरेको जानकारी दिए ।

उक्त पत्रकार सम्मेलनमा पार्टीका काठमाडौं जिल्ला इन्चार्ज सागर लिम्बू, भक्तपुर जिल्ला इन्चार्ज प्रतिमा बजगाईं, चितवन जिल्ला इन्चार्ज रक्तिम, काठमाडौं सेक्रेटरी दर्शन कुमार नेपालीलगायतको उपस्थिति थियो ।