काठमाडौं । साहित्य, कला तथा सिर्जनामा सक्रिय संस्था एपेक नेपालले २६औँ वार्षिकोत्सवको अवसर पारेर दुई सम्मान तथा पुरस्कार प्रदान गरेको छ ।

एपेक नेपालले सोमबार काठमाडौंमा एपेकद्वारा आयोजित समारोहमा ‘विश्व–ज्योति काव्य सम्मान–२०८१’ साहित्यकार उषा शेरचनलाई र ‘विश्व–ज्योति पाण्डुलिपि पुरस्कार–२०८१’ कवि हेमन्त शिशिरलाई प्रदान गरेको हो । 

कार्यक्रममा सम्मानकासाथ नगद राशि ५१ हजार रुपैयाँ प्रदान गरियो भने हेमन्त शिशिर लिखित पुरस्कृत पाण्डुलिपि ‘बन्द कोठाको झ्याल’ पुस्तकका रूपमा प्रकाशित गर्दै लोकार्पण समेत गरियो ।

नेपाल ललितकला प्रज्ञा प्रतिष्ठानका कुलपति नारदमणि हार्तम्छालीले सर्जकहरूलाई सम्मानित गर्दै एपेकले नेपाली कला र साहित्यलाई समाजसँग जोड्दै गरेको काम उल्लेखनीय भएको बताए ।

सम्मानित साहित्यकार उषा शेरचनले अक्षरको खेती गर्नु आफ्नो धर्म र कर्म भएको बताउँदै यस पुरस्कारले आफूमाथि थप जिम्मेवारी थपिएको उल्लेख गरिन् । पुरस्कृत कवि हेमन्त शिशिरले कविता वाचन गरे ।

एपेकका अध्यक्ष कवि विश्वविमोहन श्रेष्ठले एपेकले साहित्य, कला र रंगमंचलाई सधैँ जोड्दै आएको बताउँदै उषा शेरचनलाई सम्मान गर्द पाउँदा संस्था आफैँ सम्मानित भएको अनुभूत भएको बताए । उनले पाण्डुलिपि पुरस्कारका लागि ४६ वटा कविताका पाण्डुलिपि प्राप्त भएको र त्यसमा विभिन्न चरण पार गर्दै हेमन्तको कृति छनोट भएको चर्चा गरे ।