काठमाडौं । नेपाल शिक्षक महासंघका अध्यक्ष लक्ष्मीकिशोर सुवेदीले आफूहरूको आन्दोलका कारण केही उपलब्धि हासिल भएको बताएका छन् । वर्षौंदेखि नमिलेको समान ग्रेड र तलबको मुद्दा हल भएको, अस्थायी शिक्षकको बिरामी बिदा सञ्चित हुने, सिभिल अस्पतालमा उपचार सुविधा पाउने निश्चित भएको उनले उल्लेख गरेका छन् ।
सबै शिक्षकका निम्ति दुर्गम भत्ता उपलब्ध हुने निश्चित भएको, मर्यादाक्रमको माग सम्बोधनलगायत विषयलाई उनले आन्दोलनको सफलताका रूपमा उल्लेख गरेका छन् ।
बिहीबार (वैशाख १८) सामाजिक सञ्जाल फेसबुकमार्फत उनले विधेयक कानुन बन्दा लिने नियमित प्रक्रियागत समयका कारण तुरुन्तै ऐन जारी हुने परिस्थिति नरहेको स्पष्ट पारेका छन् । आन्दोलन गरिरहन पनि जटिल भएको उनको भनाइ छ ।
विद्यालय शिक्षा विधेयक तत्काल पारित गर्नुपर्ने मुख्य मागसहित शिक्षक आन्दोलित थिए । “यो आन्दोलन यस्तै रूपमा महिनौँ लम्ब्याउने अवस्था पनि जटिल थियो । त्यसैले संसदीय दलका मुख्य सचेतक र समितिको सभापतिलाई सार्वजनिक लिखित प्रतिबद्धता गराएर २०८२ असार १५ गते प्रतिनिधिसभाबाट पारित हुने गरी हामीले त्यो कामलाई सुनिश्चित गरेका छौं,” उनले लेखेका छन् ।
आवधिक बढुवा, अस्थायी अवधि गणना, पछिल्लो चरणमा स्थायी भएका शिक्षकको निवृत्तिरभणजस्ता विषय ऐनमार्फत सम्बोधन हुने उनले उल्लेख गरेका छन् ।
बुधबार (वैशाख १७) सरकारसित सहमतिसँगै २९औँ दिनमा काठमाडौंकेन्द्रित शिक्षक आन्दोलन स्थगन भएको छ ।
नेपाल शिक्षक महासंघ अध्यक्ष सुवेदीको भनाइ पढ्नोस्–
हार्दिक आभार :
यसपटकको शिक्षक–कर्मचारी आन्दोलन २०८१ माघ २० गतेबाट सुरु भयो । समग्रमा आन्दोलन ८९ दिन चल्यो, तथापि अन्तिम चरणको २९ दिनको काठमाडौंकेन्द्रित सडक आन्दोलन सर्वाधिक चर्चामा रह्यो । यसको मुख्य कारण साथीहरूको उत्साहजनक सहभागिता र नेतत्वप्रतिको समर्थन हो । यसका लागि सबै आन्दोलनकारी साथीहरूप्रति अभारी छौँ ।
१. लगातार २९ दिनसम्म चलेको काठमाडौंकेन्द्रित सडक आन्दोलनमा पानी, घाम केही नभनी उत्साहका साथ सहभागी हुने सबै शिक्षक–कर्मचारी साथीहरूप्रति आभारी छौँ । आन्दोलनको उपलब्धिका पहिलो श्रेय वहाँहरूमा जान्छ । त्यसैगरी, महासंघका पदाधिकारी, आन्दोलन परिचालन समितिका संयोजक र सदस्य, आबद्ध–सम्बद्ध संस्थाको नेतृत्व, राहत, बालकक्षा, सिकाइ अनुदान, साविक उमावि, पेन्सन सरोकार समूह, प्राविधिक धार, विशेष शिक्षा तथा विद्यालय कर्मचारी साथीहरू सबैमा यसको श्रेय जान्छ । यी सबै साथीहरूप्रति आभारी छौँ ।
२. विधेयकले कानुन बन्दा लिने नियमित प्रक्रियागत समयका कारण तुरुन्तै ऐन जारी हुने परिस्थिति रहेन । यो आन्दोलन यस्तै रूपमा महिनौँ लम्ब्याउने अवस्था पनि जटिल थियो । त्यसैले संसदीय दलका मुख्य सचेतक र समितिको सभापतिलाई सार्वजनिक लिखित प्रतिबद्धता गराएर २०८२ असार १५ गते प्रतिनिधिसभाबाट पारित हुने गरी हामीले त्यो कामलाई सुनिश्चित गरेका छौँ ।
३. वर्षौंदेखि नमिलेको समान ग्रेड र तलबको मुद्दा यसपटक हल भएको छ । अस्थायी प्रकृतिका साथीहरूको बिरामी बिदा सञ्चित हुने भएको छ । सिभिल अस्पतालमा कर्मचारीलाई जस्तै उपचार सुविधा पाउने निश्चित भएको छ । सबै शिक्षकका लागि दुर्गम भत्ता उपलब्ध हुने निश्चित भएको छ । मर्यादाक्रमको सवाल सम्बोधन भएको छ ।
३. साथीहरूले आवधिक बढुवा, अस्थायी अवधि गणना, पछिल्लो चरणमा स्थायी भएका साथीहरूको निवृत्तिरभणजस्ता विषयमा पनि मन्त्रिपरिषद्बाट हुने निर्णयमा आउनुपर्छ भन्ने कुरा राख्नुभएको थियो । तर, यी विषय ऐनले सम्बोधन गर्ने विषय भएकाले ऐनमार्फत नै सम्बोधन गराइनेछ ।
४. २०७५ पछि स्थायी भएका साथीहरूको निवृत्तिभरणको सवालमा आन्दोलनकै क्रममा केही सफलता हात लागेका छ । यसलाई पूर्णता दिन निवृत्तिभरण कोष ऐन २०७५ को संशोधन गराउनुपर्छ । शिक्षा ऐन जारीसँगै यो ऐनको संशोधनका लागि समेत प्रयत्न जारी रहनेछ ।
५. अस्थायी प्रकृतिका शिक्षक (राहत, अस्थायी, करार, साविक उमावि, सिकाइ अनुदान, विशेष शिक्षा, प्राविधिक धारलगायत)को स्थायित्वको विषय सहमतीबमोजिम ऐनबाट सम्बोधन हुनेछ । ईसीडीका शिक्षक र विद्यालय कर्मचारीको समस्याको उचित निकास ऐनमार्फत खोजिनेछ ।
६. यसपटकको आन्दोलनमा कसैलाई कुनै चोटपटक नलागोस् भन्ने हाम्रो चाहना थियो, तर छब्बिसौँ दिनमा प्रहरीको दमनका कारण ६२ जना साथीहरू घाइते हुनुभयो । ती सबै साथीहरूको शीघ्र स्वास्थ्यलाभको कामना गर्दछौँ । आन्दोलनमा वहाँहरूको योगदानप्रति उच्च सम्मान छ । आन्दोलनमा सहभागी भई घर फर्कने क्रममा मनाङका शिक्षक साथी मन घलेको निधन भएको छ । वहाँप्रति भावपूर्ण श्रध्दाञ्जली प्रकट गर्दै शोक सन्तप्त परिवार जनमा समवेदना प्रकट गर्दछौँ ।
६. आन्दोलनका क्रममा पानी वितरण गर्ने टिम नेपाललगायत संस्थाहरूप्रति पनि आभारी छौँ । त्यसैगरी, आन्दोलनको समर्थन र ऐकबद्धता प्रकट गर्ने सबैप्रति आभारी छौँ ।
७. अब जारी हुने ऐनभित्र हाम्रा सहमतिका बुँदाहरू समावेश गर्ने सवालमा हामी पक्षीकरणमा लागिरहनेछौँ ।
फेरि एकपटक सबै साथीहरूप्रति आभार व्यक्त गर्दछौँ ।
-1749010126.jpg)
