काठमाडौं । जल तथा मौसम विज्ञान विभागका अनुसार आइतबार बिहान बाग्मती प्रदेश र गण्डकी प्रदेशमा हल्का वर्षा भइरहेको छ । अहिले काठमाडौंका अधिकांश स्थानमा पानी परिरहेको छ । 

मौसमविद् सञ्जीव अधिकारीका अनुसार आगामी तीन दिनसम्म काठमाडौंमा हल्कादेखि मध्यम वर्षा हुनेछ । आगामी तीन दिन गण्डकी, कोशी, लुम्बिनीलगायत प्रदेशमा पनि मेघगर्जन र चट्याङसहित हल्का वर्षाको सम्भावना छ । 

हाल देशमा पश्चिमी वायु तथा स्थानीय वायुको प्रभाव रहेको छ। यसका साथै बंगालको खाडीबाट भित्रिरहेको जलवाष्पयुक्त हावाको समेत आंशिक प्रभाव रहेको छ।

आइतबार दिउँसो देशभर आंशिकदेखि साधारणतया बदली रहनेछ । कोशी प्रदेश र लुम्बिनी प्रदेशलगायत देशका पहाडी भू–भागका केही स्थानमा तथा बाँकी भू–भागका थोरै स्थानहरूमा मेघगर्जन, चट्याङ र हावाहुरीसहित हल्कादेखि मध्यम वर्षाको सम्भावना रहेको छ । 

साथै देशका हिमाली भू–भागका थोरै स्थानहरूमा हल्का वर्षा र हिमपातको सम्भावना रहेको छ । 

त्यस्तै, आज राति देशको पहाडी भू–भागमा आंशिकदेखि साधारणतया बदली रही बाँकी भू–भागमा आंशिक बदली रहनेछ । पहाडी भू–भागका थोरै स्थानहरूमा र बाँकी भू–भागका एक–दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ । 

हिमाली भू–भागका एक–दुई स्थानमा स्थानमा हल्का वर्षा र हिमपातको सम्भावना रहेको छ मौसम विज्ञान विभागले जनाएको छ ।