काठमाडौं । नेकपा (एकीकृत समाजवादी)को विद्यार्थी संगठन अनेरास्ववियूले प्राविधिक शिक्षा तथा व्यवसायिक तालिम परिषद् (सीटीईभीटी)लाई ज्ञापनपत्र बुझाएको छ । बुधबार अनेरास्ववियूका नेताहरूले सीटीईभीटीका सदस्यसचिव महेश भट्टराईलाई कार्यालयमै भेटेर ज्ञापनपत्र बुझाएका हुन् ।

अनेरास्ववियूले यसै शैक्षिकसत्रदेखि कुनै पनि कार्यक्रममा प्रवेश परीक्षाबिना विद्यार्थी भर्ना लिने भनी गरिएको ०८२ वैशाख २६ गते सीटीईभीटीको बैठकले गरेको निर्णयमा गम्भीर ध्यानाकर्षण भएको बताएको छ ।

"यसरी बिनाप्रवेश परीक्षा जीपीएको भरमा मात्र विद्यार्थी भर्ना लिँदा सामुदायिक विद्यालयबाट पास भई आएका विद्यार्थी मारमा पर्ने, जीपीए सामुदायिकका भन्दा प्राइभेटबाट आयका विद्यार्थीहरूको बढी हुने र सीटीईभीटीमा पढ्ने अवसर पनि प्राइभेटका विद्यार्थीले धेरै पाउने भएको हुँदा हरेक विद्यार्थीहरूलाई समान ढंगले अवसर दिनको निम्ति प्रवेश परीक्षा अनिवार्य गरिनुपर्ने," अनेरास्ववियूले भनेको छ ।

अनेरास्ववियूले प्रवेश परीक्षा लिन नपर्ने निर्णय तत्काल खारेज गर्नुपर्ने माग राखेको छ । अन्यथा आन्दोलन गर्ने अनेरास्ववियूको चेतावनी छ ।