काठमाडौं । निजी सवारीसाधनलाई यात्रु बोक्ने सुविधासरह सञ्चालनको अनुमति दिने गरी देशका सबै प्रदेश सरकारले नियमावली ल्याउन लागेको भन्दै सार्वजनिक यातायात व्यवसायी आन्दोलित भएका छन् । त्यसकै विरोधमा सार्वजनिक यातायात बचाऊ केन्द्रीय संघर्ष समितिको अगुवाइमा शनिबार (जेठ १७) काठमाडौंमा एक घण्टा सवारीसाधन रोकेर धर्ना दिइयो ।

गण्डकी प्रदेश सरकारले उक्त नियमावली ल्याएपछि व्यवसायी आन्दोलित भएका हुन् । उनीहरूले गण्डकी सरकारले निजी सवारीसाधन सञ्चालन गर्न ल्याएको नियमावली खारेज गर्नुपर्नेलगायत माग अघि सारेका छन् ।

सवारी ऐन, २०४९ को विपरीत गण्डकी सरकारले ‘राइड सेयरिङ’को नाउँमा निजी सवारीसाधनलाई यात्रु बोक्ने सुविधा दिएर सम्पूर्ण सार्वजनिक यातायात क्षेत्रलाई अस्तव्यस्त गर्ने काम व्यवसायीको भनाइ छ । सोही कारण आन्दोलन गर्नुपरेको सार्वजनिक यातायात केन्द्रीय महासंघका अध्यक्ष डोलनाथ खनालले बताए ।

उनले हाल आन्दोलन सांकेतिक मात्र भएको बताए । यही जेठ १९ गतेदेखि देशभर आन्दोलन गर्ने उनले चेतावनी दिए ।

सार्वजनिक यातायात केन्द्रीय महासंघका उपमहासचिव केशव नेपालले अरू प्रदेशमा पनि उक्त व्यवस्था लागु गर्न खोजिएकाले त्यसविरुद्ध शान्तिपूर्ण रूपमा एक घण्टा धर्ना आयोजना गरिएको बताए ।

उनीहरूले संघीय ऐनसँग बाझिने गरी छुट्टै नियमावली ल्याउन नहुनेमा जोड दिएका छन् । गण्डकी प्रदेशले ल्याएको नियमावली खारेज गर्न माग गरेका छन् । हिमालयन टेली भ्वाइस