काठमाडौं । इरानले बुधबार आफ्नो सबैभन्दा घातक हतियार, हाइपरसोनिक फताह क्षेप्यास्त्रले इजरायलमाथि आक्रमण गरेको दाबी गरेको छ । इरानको इस्लामिक रिभोलुसनरी गार्ड कोर्प्स (आईआरजीसी)ले इजरायलको राजधानी तेल अभिभतर्फ क्षेप्यास्त्र प्रहार गरिएको दाबी गरेको बीबीसीले जनाएकाे छ ।

इरानको सरकारी समाचार एजेन्सी मेहर र सरकारी च्यानल प्रेस टीभीले पनि आईआरजीसीलाई उद्धृत गर्दै फताह–१ मिसाइल प्रहार गरिएको बताएको छ ।

प्रेस टीभीका अनुसार, "आईआरजीसीले अभियानको पछिल्लो चरणलाई एउटा महत्त्वपूर्ण मोडको रूपमा वर्णन गरेको छ । यसले पहिलो पुस्ताको फताह क्षेप्यास्त्रको तैनाथीले इजरायलको भर्चुअल क्षेप्यास्त्र प्रतिरक्षा प्रणालीको अन्त्यको सुरुआत भएको बताएको छ ।"

शुक्रबारदेखि सुरु भएको द्वन्द्वमा एकातिर इजरायलले इरानको आणविक केन्द्र र सैन्य अड्डाहरूलाई निसाना बनाएको छ भने अर्कोतिर इरानले तेल अभिभ र हाइफा बन्दरगाहमा मिसाइल प्रहार गरेको छ ।

यसअघि, जब इरानले अक्टोबर १, २०२४ मा इजरायलमाथि आक्रमण गरेको थियो, त्यसले दर्जनौँ फताह–१ मिसाइलहरू प्रहार गरेको थियो ।

यद्यपि, यो क्षेप्यास्त्र हालको द्वन्द्वमा पहिलोपटक प्रयोग गरिएको छ ।

फताह मिसाइल पहिलोपटक सन् २०२३ मा सार्वजनिक गरिएको थियो र इरानका सर्वोच्च नेता अली खामेनीले यसको नामकरण गरेका थिए । आईआरजीसीले यो मिसाइललाई 'इजरायल–स्ट्राइकर' नाम दिएको छ ।  

अनि जब यसको अनावरण गरियो, त्यहाँ एउटा विशाल ब्यानर थियो जसमा हिब्रूमा लेखिएको थियो, "तेल अभिभमा ४०० सेकेन्ड ।"

आईआरजीसीले यसलाई हाइपरसोनिक मिसाइल भएको दाबी गर्छ, तर सैन्य विज्ञहरूले यसको वास्तविक हाइपरसोनिक क्षमतामा शंका गर्छन् ।

अल फताहको गति पाँच किलोमिटर प्रतिसेकेन्ड
हाइपरसोनिक भन्नाले त्यस्ता हतियारहरूलाई बुझिन्छ जसको गति सामान्यतया ध्वनिको गतिभन्दा ५ देखि २५ गुणा बढी हुन्छ ।

इरानले पहिलोपटक फताह मिसाइललाई ब्यालिस्टिक र क्रूज दुवै वर्गमा हाइपरसोनिक मिसाइलको रूपमा प्रस्तुत गरेको थियो ।

'अल–फताह' हाइपरसोनिक क्षेप्यास्त्रको दायरा १,४०० किलोमिटर छ र आईआरजीसीले सबै क्षेप्यास्त्र प्रतिरक्षा प्रणालीहरूबाट बच्न र तिनीहरूलाई नष्ट गर्ने क्षमता रहेको दाबी गरेको छ ।

अल–फताह ठोस इन्धन मिसाइलहरूको एक पुस्ता हो जसको लक्ष्यमा प्रहार गर्नुअघि १३ देखि १५ 'म्याक'को गति हुन्छ । म्याक १५ को अर्थ प्रतिसेकेन्ड पाँच किलोमिटरको गति हो ।

क्रान्तिकारी गार्ड्स एयरोस्पेस अर्गनाइजेसनका कमाण्डर अमिर अली हाजिजादेहले अल–फताह मिसाइलको अनावरण समारोहमा भने– यो मिसाइल धेरै छिटो छ र वायुमण्डलभित्र र बाहिर जान सक्छ । हाजिजादेहले यो पनि दाबी गरे कि फताहलाई कुनै पनि मिसाइलले नष्ट गर्न सकिँदैन ।

अल–फताह ब्यालिस्टिक क्षेप्यास्त्रको अनावरणपछि, तेहरानको ुप्यालेस्टाइन स्क्वायरु मा इजरायललाई धम्की दिने पोस्टर टाँसिएको थियो जसमा '४०० सेकेन्डमा तेल अभिभ' लेखिएको थियो ।

'अल–फताह १' को अनावरण भएको चार महिना पछि, रिभोलुसनरी गार्ड्सले 'अल–फताह २' को अनावरण गर्‍यो, जुन १,५०० किलोमिटरको दायरा भएको नयाँ पुस्ताको क्रूज मिसाइल हो ।

इरानी मिडियाका अनुसार 'अल–फताह २' मा धेरै कम उचाइमा उडान भर्ने क्षमता छ र उडानको क्रममा धेरै पटक आफ्नो बाटो परिवर्तन गर्न सक्छ ।

इरानका सर्वोच्च नेता अली खामेनीले आईआरजीसी सम्बद्ध आशुरा युनिभर्सिटी अफ एयरोस्पेस साइन्सेस एण्ड टेक्नोलोजीको भ्रमण गर्दा 'अल–फताह २' क्रूज मिसाइल अनावरण गरेका थिए, तर मिसाइलको दायराको बारेमा कुनै जानकारी दिइएको थिएन ।

इरानले इजरायलविरुद्धको खतराको सामना गर्न फताह क्षेप्यास्त्र प्रयोग गरे पनि, अप्रिल १३ र त्यसपछि भएका आक्रमणहरूमा यी क्षेप्यास्त्रहरू प्रयोग गरेन ।