काठमाडौं । पूर्वप्रधानमन्त्री माधवकुमार नेपालको थुनछेक बहस सकिएको छ । अख्तियार दुरुपयोग अनुसन्धान आयोगले भ्रष्टाचार मुद्दा लगाएपछि बुधबार आफैँ अदालतमा हाजिर हुन पुगेका पूर्वप्रधानमन्त्री तथा नेकपा (एकीकृत समाजवादी)का अध्यक्ष नेपालको आजै (बुधबार) बयान सकेर थुनछेक बहस भएको हो । बहस सकिएसँगै आजै आदेश हुने विशेष अदालत इजलासले जनाएको छ ।

थुनछेक बहसमा अख्तियार दुरुपयोग अनुसन्धान आयोगका तर्फबाट वरिष्ठ अधिवक्ता सुशीलकुमार पन्त, विशेष सरकारी वकिल कार्यालयका प्रमुख मोहनसागर बस्याल, विशेष सरकारी वकिलकै भगवती गौतम, उमाकान्त पौडेल र ज्ञानप्रसाद भुसालले बहस गरेका थिए ।

उनीहरूले मन्त्रिपरिषद्ले २०६६ पुस २२ गते गरेको निर्णय २९ गते उल्टाएर पतञ्जलीको व्यापार योजनालाई सहयोग पुग्ने गरी निर्णय गरेका कारण उक्त निर्णय नीतिगत हुन नसक्ने र माधव नेपालमाथि कारबाही अघि बढाउनुपर्ने दलिल प्रस्तुत गरेका थिए । 

नेपालका तर्फबाट वरिष्ठ अधिवक्ताहरू शम्भु थापा, गोविन्दप्रसाद बन्दी, खम्बबहादुर खाती, रमन श्रेष्ठ, दिनेश त्रिपाठी, टीकाराम भट्टराईसहितले बहस गरेका थिए । नेपालका तर्फबाट बहस गर्नेहरूले संविधानको धारा ८२ र अख्तियार दुरुपयोग अनुसन्धान आयोग ऐनको दफा ४ को 'ख' बमोजिम अख्तियारले आफ्नो क्षेत्रधिकार मिचेको भन्दै मुद्दा नै खारेज बाँकी रहेको दाबी गरे । उनीहरूले मन्त्रिपरिषद्को कार्यसम्पादनसम्बन्धी ऐनको समेत ख्याल नगरी अख्तियारले मुद्दा दायर गरेको बता‌ए ।  

मन्त्रिपरिषद्ले गर्ने निर्णय कुन नीतिगत हो, कुन होइन भनेर बल्ल छलफल सुरु भएको भन्दै नेपालविरुद्धको मुद्दा चलाउने हो भने संसद्को औचित्य सकिने र अख्तियार नै सर्वे सर्वाउने दाबी गरे । 

संविधानको व्याख्या गर्ने अधिकार सर्वोच्चको संवैधानिक इजलासलाई मात्र रहेको भन्दै अख्तियारले आफैँ सर्वोच्च बन्ने प्रयास गरेको उनीहरूको दाबी छ । नेपाल पक्षका वकिलहरूले पूर्वप्रधानमन्त्री र एउटा पार्टीको अध्यक्षलाई तारिखमा पनि राख्न उपयुक्त नहुने भन्दै बोलाएको समयमा उपस्थित हुनेगरी आदेश गर्न इजलाससमक्ष माग गरेका छन् ।