काठमाडौं । गृह मन्त्रालयले राष्ट्रिय मर्यादासम्बन्धी विधेयक मन्त्रालयको तर्फबाट मन्त्रिपरिषद् हुँदै सदनमा लैजानुपर्ने धारणा राखेको छ । जसमा राष्ट्रियसभाका सांसदहरूले आपत्ति जनाएका छन् ।

सोमबार विधायन व्यवस्थापन समितिको बैठक बसेको थियो । बैठकमा राष्ट्रिय मर्यादासम्बन्धी विधेयक २०७९ माथि छलफल भएको थियो । यो विधेयक गैरसरकारी विधेयक हो ।

विधेयकमाथिको छलफलमा गृह मन्त्रालयको तर्फबाट उपस्थित सहसचिव तुलसीबहादुर श्रेष्ठले गृहमन्त्री नारायणकाजी श्रेष्ठले विधेयकलाई मन्त्रालयको माध्यमबाट मन्त्रिपरिषद् हुँदै सरकारी विधेयकको रूपमा अघि बढाउन चाहेको बताए ।

“गृहमन्त्री बिरामी भएर आउन सक्नुभएन । गृहसचिव अख्तियारमा कार्यक्रम भएर जानुभयो त्यसैले बैठकमा म आएको छु । यसबारे मलाई सबै कुरा थाहा त छैन,” उनले बैठकमा भने, “तर, मन्त्रीज्यूले सबै होमवर्क गरेर गृह मन्त्रालयबाट विधेयक अघि बढाउनुपर्छ, मन्त्रिपरिषद्‌मा लैजानुपर्छ भन्नुभएको छ र यहीँ कुरा बैठकमा राखेर आउनु भन्नुभएको छ ।”

उनी बोलिनसक्दै विधेयक मस्यौदाकार सांसद रमेशजंग रायमाझीले सांसदलाई कम आक्ने भन्दै गृह मन्त्रालय भन्दा सार्वभौम संसद् ठूलो हुने जिकिर गर्दै जवाफ दिए । उनले मन्त्रालयले अघि बढाउन चाहेको भए बेलैमा विधेयक किन नबनाएको भन्दै प्रतिप्रश्न गरे । मन्त्रिपरिषद्‌मामा विधेयक लैजाने कुरा आफूहरूलाई मान्य नभएको स्पष्ट पारे ।

“सांसदलाई गुम्राहमा राख्ने कुरा ठिक छैन । यो विधेयक सबै दलको सहमतिमा आएको हो । गृह मन्त्रालय भन्दा ठूलो संसद् हो,” रायमाझीको जवाफ थियो, “गृहले पहिले सोेचेर विधेयक ल्याएको भए हुने थियो । यसमा पटक–पटक छलफल भएको छ । यसलाई लिङ्गरिङ गर्ने काम सह्य छैन । विधेयक मन्त्रिपरिषद्‌मा जाँदैन ।”

सोमबारको समिति बैठकले विधेयकलाई पास गरेको छ । समितिले मंगलबार बस्ने राष्ट्रियसभा बैठकमा विधेयक पेस गर्ने निर्णय गरेको समिति सभापति जयन्तीदेवी राईले जानकारी दिइन् ।