काठमाडौं । नेपाली कांग्रेसका प्रमुख सचेतक रमेश लेखकाले सहकारीको रकम हिनामिना प्रकरणमा मुछिएका उपप्रधान तथा गृहमन्त्री रवि लामिछानेमाथि समेत छानबिन हुने गरी संसदीय समिति गठन गर्नुपर्ने बताएका छन् । 

मंगलबार सभामुख देवराज घिमिरेको आह्वानमा भएको प्रधानमन्त्रीसहितको छलफलपछि सञ्चारकर्मीसँग उनले सहकारीको रकम हिनामिना प्रकरणको सबै छानबिन गर्नेगरी संसदीय छानबिन समिति गठन गर्नुपर्ने बताएका हुन् । 

मंगलबार बिहान बसेको राष्ट्रिय स्वतन्त्र पार्टी (रास्वपा)ले आफ्ना सभापति तथा उपप्रधान तथा गृहमन्त्री लामिछानेमाथि छानबिन गर्नेगरी संसदीय छानबिन समिति गठन गर्न अस्वीकार गर्ने निर्णय गरेको थियो । 

तर, कांग्रेस प्रमुख सचेतक लेखकले गृहमन्त्री लामिछानेका विषयमा प्रश्न उठेकाले उनीमाथि पनि छानबिन गर्नेगरी समिति गठन गर्नुपर्ने बताए । 

“सरकार संघीय सदनको आगामी अधिवेशनमा प्रस्तुत हुँदा सहकारी हिनामिनामा छानबिन गर्न संसदीय छानबिन समिति गठन गरी प्रस्तुत हुनुपर्छ ।  गृहमन्त्रीको संलग्नता रहेको विषय चारैतिर देखिएको छ । उहाँको विषयमा पनि प्रश्न उठेपछि छानबिन गर्न समिति बन्छ भन्ने विश्वास राखेका छौँ,” उनले भने । 

गृहमन्त्री लाछिानेमाथि छानबिन हुनुपर्ने दोहोर्‍याउँदै उनले भने, “देशभर धेरै सहकारीमा लाखौँ मानिसको धेरै रकम हिनामिना भएको छ । मन्त्रीजीको बारेमा प्रश्न उठेपछि त्यसलाई सम्बोधन नगर्ने, गृहमन्त्री एक व्यक्ति हो र ? एकजनामाथि छानबिन नै नगर्ने भन्ने हुन्छ ? सदन र मिडियामा दिनदिनै राम्रो नेतामाथि प्रश्न उठ्नु ठिक होइन, उहाँमाथि प्रश्न उठेपछि छानबिन हुनुपर्छ ।”

सहकारीपीडितको कुरा सरकारले नसुनेको भन्दै उनले राज्यको निकाय नै दुरूपयोग भएको आरोप लगाए । आफूहरूले संसदीय छानबिन समिति बनाउनुपर्ने माग बैठकमा राखेको जानकारी दिँदै उनले समिति गठन हुने विश्वास लिएको बताए ।