काठमाडौं । रूसको एक अदालतले विपक्षी नेता एलेक्सी नभाल्नीद्वारा स्थापित भ्रष्टाचार विरोधी समूहसँग आवद्ध भएर काम गरेको र उग्रवादलाई प्रश्रय दिएको आरोपमा चारजना पत्रकारलाई दोषी ठहर्‍याएको छ । प्रत्येकलाई ५ वर्ष ६ महिनाको कैद सजाय सुनाइएको समाचार संस्था एपीले जनाएको छ ।

एन्टोनिना फाभोस्र्काया, कोन्स्टान्टिन गाबोभ, सेर्गेई करेलिन र आर्टेम क्रिगरलाई उग्रवादी समूहसँग संलग्न भएकाले दोषी करार गरिएको समाचारमा उल्लेख छ । तर, सबै पत्रकारले आफू निर्दोष भएको र पत्रकारको रूपमा मात्र कर्तव्य निर्वाह गरे पनि अभियोग लगाइएको बताएका थिए ।

बन्द कोठामा पत्रकारविरुद्ध चलेको यो मुद्दा रुसले सन् २०२२ को फेब्रुअरीमा युक्रेनमा सैन्य आक्रमण गरेपछि देशभित्र उठेको विरोधको स्वरलाई दबाउने अभियानको एक अंश भएको दाबी गरिएको छ । 

लामो समयदेखि रूसी प्रशासनले विपक्षी नेतृत्व, स्वतन्त्र पत्रकार, मानवअधिकारकर्मी र राष्ट्रपति भ्लादिमिर पुटिन विरोधी साधारण नागरिकलाई निशाना बनाएर सयौंलाई जेल तथा हजारौंलाई देश छोड्न बाध्य पारेको छ ।