काठमाडौ । भारतको नागरिक उड्डयन ब्युरोले टर्कीको कम्पनी सेलेबीको सुरक्षा ‘क्लियरेन्स’ तत्काल लागु हुने गरी रद्द गरेको छ । टर्कीको कम्पनी सेलेबी एभिएसनले भारतका धेरै विमानस्थलमा सुरक्षासम्बन्धी काम गरिरहेको थियो ।

ब्युरोले सेलेबीविरुद्धको कारबाहीका विषयमा सामाजिक सञ्जालमार्फत जानकारी दिएको छ ।

ब्युरोले जारी गरेको विज्ञप्तिमा भनिएको छ, “बीसीएएसका महानिर्देशकलाई प्राप्त अधिकारको प्रयोग गर्दै राष्ट्रिय सुरक्षाको हितमा सेलेबी एयरपोर्ट सर्भिसेज इन्डिया प्राइभेट लिमिटेडको सम्बन्धमा सुरक्षा मन्जुरी तत्काल प्रभावले रद्द गरिएको छ ।”

टर्कीले भारतको आलोचना र पाकिस्तानको समर्थन गरेको समयमा यस्तो निर्णय गरिएको हो । गएको अप्रिल २२ मा कश्मीरको पहलगाममा आतंकवादी आक्रमणपछि भारतले पाकिस्तानका केही स्थानमा हमला गरेको थियो । त्यसको टर्कीले आलोचना गरेको थियो । टर्कीले पाकिस्तानलाई समर्थन गरेको थियो । बीबीसी हिन्दीबाट ।