काठमाडौं । विद्युतीय सवारीसाधनको संख्या विश्वव्यापी रूपमा लगभग एकतिहाइले बढेर पाँच करोड ५८ लाख पुगेको छ । जसमध्ये चीनका तीन करोड १४ लाख सवारीसाधनले कुल संख्याको ५० प्रतिशतभन्दा बढी हिस्सा ओगटेको जर्मन ऊर्जा अनुसन्धान समूहको गणनाले देखाएको याहुन्युजले जनाएको छ ।

ब्याडेन–वुर्टेमबर्गको सौर्य ऊर्जा र हाइड्रोजन अनुसन्धान केन्द्रद्वारा संकलित तथ्यांकमा पूर्ण रूपमा विद्युतीय सवारीसाधन, प्लग–इन हाइब्रिड वा रेन्ज एक्सटेन्डर भएका विद्युतीय कारहरू समावेश भएको बताइएको छ ।

दोस्रो स्थानमा, चीनसँग धेरै अन्तरमा अमेरिकासँग ६४ लाख सवारीसाधन रहेको छ । जर्मनी २६ लाख सवारीसाधनका साथ तेस्रो स्थानमा छ । ब्रिटेन र फ्रान्समा लगभग २१ लाख सवारीसाधन छन्, जबकि नर्वेमा १० लाखभन्दा बढी छन् ।

सवारीसाधनको वृद्धि र ह्रासलाई समेत समावेश गर्ने ‘फ्लीट’को वृद्धिलाई हेर्दा, रोचक तर चुनौतीपूर्ण तस्बिर देखिन्छ । वर्षौंसम्मको उच्च वृद्धिपछि, सन् २०२४ मा एक करोड ३८ लाख सवारीसाधनले बढेको छ, जुन सन् २०२३ मा एक करोड ४२ लाखको तुलनामा कमी हो ।

यो किन पनि आश्चर्यजनक छ भने नयाँ दर्ता भने उल्लेखनीय रूपमा बढिरहेको छ । नयाँ दर्ता र ‘फ्लीट’ वृद्धिबीच ३.७ मिलियन सवारीसाधनको अन्तर देखिएको छ, जुन मुख्य रूपमा चीनसँग सम्बन्धित छ । विगतका वर्षहरूमा यो अन्तर केही लाखको मात्र थियो । “हामी सुरुमा चीनको तथ्यांकले आश्चर्यचकित भयौँ,” ब्याडेन–वुर्टेमबर्गको सौर्य ऊर्जा र हाइड्रोजन अनुसन्धान केन्द्रका एन्ड्रियास पुट्नरले भने । उनले नयाँ दर्ता र ‘फ्लीट’ वृद्धिबीचको उल्लेखनीय अन्तरलाई व्याख्या गर्न धेरै कारकहरूको संयोजन जिम्मेवार रहेको अनुमान गरेका छन् ।

पहिलो, विशेषगरी चीनमा, पुराना सवारीसाधनहरूको संख्या बढ्दै गएको छ, जसले गर्दा धेरै सवारीसाधन स्क्रयाप वा निष्क्रिय भएका छन् । यो अवस्था डिजिटल प्रविधि र रेन्जमा निरन्तर सुधार भइरहेका विभिन्न मोडलहरूको तीव्र वृद्धि र ग्राहकहरूको नयाँ मोडलप्रतिको चाहनाले पनि प्रेरित छ ।