काठमाडौं । नेपाल राष्ट्र बैंकका गभर्नर डा. विश्वनाथ पौडेलले ३७३ जनासँग बैक तथा वित्तीय संस्थाको प्रमोटर सेयर रहेको बताएका छन् । प्रतिनिधिसभाअन्तर्गतको अर्थ समितिको बैठकमा बिहीबार (असार १९) आमन्त्रित उनले यस्तो बताएका हुन् ।

वाणिज्य बैंकमा ७२ जनाको एक प्रतिशतभन्दा बढी प्रमेटर सेयर रहेको उनले उल्लेख गरे । विकास बैंकमा १३० र फाइनान्समा १७१ जनाको प्रमोटर सेयर रहेको उनले जानकारी दिए ।

संस्थापक सेयरको दुई प्रतिशतभन्दा बढी स्वामित्व हस्तान्तरणमा राष्ट्र बैंकको स्वीकृति चाहिने व्यवस्था ऐनमै किटान गर्ने वा नगर्ने भन्ने विषयमा लचिलो हुन सकिने उनले बताए । “अर्थतन्त्र गतिशील भइरहेको बेला कति प्रतिशत भन्ने कुरा ऐनमै बाँध्नुभन्दा राष्ट्र बैंकलाई नै छाडिदिनु ठिक हुन्छ कि भन्नेमा छलफल हुनसक्छ,” उनले भने ।

वित्तीय स्वार्थ र सम्बन्धित व्यक्ति वा संस्थासँगको कारोबारलाई थप पारदर्शी र अनुशासित बनाउन खोजिएको उनले स्पष्ट पारे ।

उनले बैंकमा रहेको ७० खर्ब रुपैयाँलाई कसैको निजी सम्पत्ति मात्र नभई समग्र अर्थतन्त्रको स्रोत मान्नुपर्नेमा जोड दिए । राम्रो व्यावसायिक सोच र उद्यमशीलता भएका जोकोहीले यो स्रोतमाथि दाबी गर्न पाउनुपर्ने उनको तर्क छ ।