ताप्लेजुङ । पाथीभरा दर्शनका लागि जाने क्रममा शुक्रबारदेखि बेपत्ता भएका झापाको अर्जुनधारा नगरपालिका–५ का लोकप्रसाद पराजुली मृत अवस्थामा फेलापरेका छन् ।

पाथीभरा क्षेत्रको माथिल्लो फेदीदेखि करिब अढाई किलोमिटर उत्तरतर्फको जंगलमा मृत अवस्थामा फेलापरेको जिल्ला प्रहरी कार्यालय ताप्लेजुङले जनाएको छ ।

मानसिक रूपमा सामान्य अस्वस्थ रहेका ६० वर्षीय पराजुली आज बिहान मृत अवस्थामा फेलापरेको ताप्लेजुङ प्रहरी प्रमुख एवं प्रहरी नायब उपरीक्षक राजन लिम्बूले जानकारी दिए ।

प्रहरीका अनुसार भरियामार्फत मन्दिर जाँदै गर्दा बीचबाटोमै पिसाब फेर्न भन्दै निस्किएका पराजुली उक्त समयदेखि नै बेपत्ता भएका थिए । पिसाब फेर्न निस्किएका पराजुली लामो समयसम्म नफर्किएपछि आफन्त, स्थानीय र प्रहरीको टोली खोजीमा लागेको थियो ।

झापाबाट यही वैशाख १९ गते श्रीमती, छोरा, बुहारी, नातिनी र आफन्तसहित आएका पराजुली बुधबार बेलुका माथिल्लो फेदीस्थित होटेलमा बसेर बिहान भरियामार्फत मन्दिरतर्फ गएका थिए । पराजुलीको शव कानुनी प्रक्रिया पूरा गरेर निकाल्ने तयारी भएको र घटनाका सम्बन्धमा थप अनुसन्धान भइरहेको प्रहरीले जनाएको छ । रासस