काठमाडौं । देशभरका सामुदायिक विद्यालयका पेन्सनबाट वञ्चित र विभिन्न वर्गका अस्थायी शिक्षक काठमाडौं केन्द्रित आन्दोलनमा छन् । त्यसमा राहत, बाल विकास, विशेष विद्यालयका शिक्षक, विद्यालय कर्मचारीलगायत छन् । 

नेपाल शिक्षक महासंघले नेतृत्व गरेको आन्दोलन असोज ३ देखि ५ गतेसम्म चल्यो । ५ गते सरकारसँग ६ बुँदे सहमति भएसँगै त्यसमा चित्त बुझेका शिक्षक जिल्ला फर्किए । तर, ४० हजार राहत शिक्षक, ३६ हजार बाल विकास, ३२ हजार पेन्सन वञ्चित र ३२ हजार कर्मचारीलगायतको नेतृत्व गरिरहेका शिक्षक नवौँ दिनसम्म पनि माइतीघर नयाँ बानेश्वर सडकमा चर्को नाराबाजी गरिरहेका छन् । 

बिहीबार मात्रै विभिन्न जिल्लाबाट ५० वटाभन्दा बढी बस रिजर्भ गरी शिक्षक काठमाडौं भित्रिएको नेपाल राहत शिक्षक केन्द्रीय कार्यसमितिका महासचिव कुमार बजगाईंको दाबी छ । 

बुधबार जुलुस लिएर बानेश्वरतर्फ अघि बढ्ने क्रममा प्रहरीसँग ठेलमठेल भयो । सातजना शिक्षक सख्त घाइत भएर राष्ट्रिय ट्रमा सेन्टरमा उपचाररत रहेको बजगाईं बताउँछन् ।

तर पनि आफ्ना माग पूरा गर्न अपांगता भएकादेखि दुधे बालक बोकेका शिक्षक यतिखेर काठमाडौंको तातो सडकमा उत्रिएका छन् । कहिले नाचगान र रचनात्मक क्रियाकलाप गरेर समय बिताउँछन् त कहिले सडकछेउका रुखमुनिको शीतलमा बस्छन् ।

सडकबीचमै बेचिने काँक्रो, फलफूल, पोलेको मकै, खजुरी र पानी शिक्षकको दैनिक खाजाजस्तै बनेको छ । कोही थकित भएर कोही रुखमुनि नै निदाइरहेका देखिन्छन्, कोही तलतल मेट्न सडकछेउमा बसेर सुर्ती माडिरहेका ।

यता आन्दोलनका कारण सडकमै व्यापार गर्ने साना व्यापारीहरूलाई पनि फाइदै भएको बताउँछन्, कहिले त पानीको गाडी नै सडकमा राखिएको देखिन्छ । 

त्यसो त सडकमै खटिने सुरक्षाकर्मीको पनि भोक, प्यास र पीडा कम छैन । तर, बानी परेका र नपरेका पेसाकर्मीको अनुभव फरक छ । जे होस्, आफ्ना मागहरू पूरा नभएसम्म घाइते त के गोली नै खानु परे पनि सडक नछोड्ने आन्दोलनबाट पछि नहट्ने शिक्षकहरूको अडान छ ।